Ezinye izakhamizi zeMatobo eMatabeleland South zibikwa zehlulekile ukubhalisela ukuvota ngenxa yokuthi imitshina esetshenziswayo kulokuhlelo ayenelisi ukuthatha imfanekiso yeminwe yabo amafinger prints ngemva kwesimo sayo nxa besanda ukugola amacimbi, okuyikho abakwenzayo kulezi insuku.
UMnu, Edgar Ncube obeqhuba uhlelo lokukhuthaza abantu ukuthi bebhalisele ukuvota uthi uzibonele ngawakhe udubo olubhekane lezakhamizi.
Lokhu kugcizelelwe nguMnu. Kudakwashe Zulu oyisakhamuzi seMatobo othi kuyadingeka ukuthi uhlangothi olubona ngezokhetho olweZimbabwe Electoral Commission iZEC lukhangelisise imitshina yabo.
UMnu. Rabson Nyoni ongumqondisi weZEC eZansi yemaNdebeleni uvumile ukuthi kulobunzima bokuthatha imifanekiso yeminwe elimeleyo kodwa wathi kulendlela abazisebenzisayo ukuze abantu bengalahlekelwa lithuba lokubhalisela ukuvota.
Uphinde wakhuthaza uzulu wemaNdebeleni ukuthi athathe lelithuba ukuyabhalisela ukuvota ngobunengi.
Ihlandla lesibili leBVR lisungulwee mhla zilitshumi kulinyanga njalo luzagqitshwa linyanga iphela .Loluhlelo luqhutshwa kusalungiselelwa olokuhlela kutsha izigaba leziqinti zokuvota i-delimitation exercise phambilini kokhetho lomnyaka ozayo.
Kusenjalo inani labantu elihlaselwe ngumkhuhlane weCovid 19 esabelweni seZansi yemaNdebeleni liqongile kuliviki.
Izansi yemaNdebeleni ibihamba phambili ngenani labantu ababanjwe lumkhuhlane kusukela ngolwesithathu.
Abanye balabo ababanjwe lumkhuhlane yizisebenzi zikahulumende ebezibuthene endaweni ezitshiyeneyo zifundela ukubala abantu kuhlelo lweCensus.