Ibandla leZANU PF liqhube umkhosi wokuthakazelela ukunqoba kwalo kukhetho lwama by-elections eEpworth ngoMgqibelo lapho umkhokheli walo umongameli Emmerson Mnangagwa azise abasekeli bakhe ukuthi umongameli Uhuru Kenyatta weKenya kaseyikubuya eZimbabwe ukuba ngumhlonitshwa emkhosini wokuthengiselana oweZimbabwe International Trade Fair koBulawayo ngenxa yokubhubha kuka lowo owayengumongameli walelolizwe uMnu. Mwai Kibaki izolo.
Uphinde wathi ibandla lakhe liyathokoza ngokunqoba eEpworth kukhetho lokudinga ozamela lesi isigaba ephalamende njalo uzafeza isifiso sabantu esokuthi lindawo ibe lidolobho njengoba umphathintambo kahulumende obona ngalokhu engowebandla leZANU PF.
Umongameli Mnangagwa uthe bazagcwalisa izithembiso abazethulela abantu phambilini kokhetho ezokuthi baphiwe incwadi zokuthi sebengabanini bezindlu zabo ngokusemthethweni, ama title deeds alotshwe ngemitshina yakulezi insuku ukwenzela ukuthi engaphazamiseki. Wengeze wathi uzavakatshela izigaba zonke zelizwe lapho ibandla lakhe elanqoba khona kukhetho olwedluleyo.
Ugcizelele ukuthi osomabhizimusi abaficakala bentshintsha imali yakwamanye amazwe ngesisindo esingekho emthethweni bazajeziswa. Umongameli Mnangagwa uthe kuyathokozisa ukuthi ibandla lakhe lithethe zonke izigaba ezazivele zingezazo kukhetho olwedluleyo, laphinda lathathela lebandla leCitizens Coalition for Change ezimbili.
Kodwa ingcwethi ecubungula ezombusazwe njalo elilunga lebandla leCCC uMnu. Zenzo Nkomo uthi ibandla leZANU PF alikho esimeni sokunqoba kukhetho oluzayo njalo ibandla eliphikisayo lalo lanqoba kukhetho lwama by elections.