Uhulumende usesungule uhlelo lokulungisisa imigwaqo yakoBulawayo esiwonakele okwamagama, lapho akhangelele ukusebenzisa izigidi ezedlula amakhulu ayisikhombisa lengxenye zamadola-$768 million.
Uhlelo lolu ngolokusebenzelana kwekhansili yaleli dolobho logatsha lukahulumende olubona ngokuthwalwa kwabantu lempahla olweMinistry of Transport and lnfrastructure Development.
Uhlelo olweEmergency Road Rehabilitation Programme 2 (ERRP2) lusungulwe nguhulumende ngemva kokunanzelela ukwehluleka kwamakhansili elizweni lonke ukuqhuba lumsebenzi.
Umsekeli kaMeya wako Bulawayo, uKhansila Mlandu Ncube wamukele ngenjabulo uncedo lokulungisisa imigwaqo yaleli dolobho ethi kuzaphathisa kunhlelo abakade belazo.
“Ikhansili ivele ilohlelo lokulungisa imigwaqo edolobheni langaze izakhamizi zingabe zicabanga ukuthi alukho kodwa lukhona siyazama indlela zonke. UKhami road oqonda eKhami prison sesiwulungisile, even lasedolobheni besisenza i pothole patching. Konke lokhu siyakwenza kodwa ichallenge yimali ezinlutshwane ekhansilini.”
UMnu. Ambrose Sibindi, umgcinisihlalo wenhlanganiso yezakhamizi eyeBulawayo Progressive Residents Association, uthi kuyisinqumo esihle ukuthi uhulumende angenele ekuvuseleleni imigwaqo.
"Siyananzelela ukuthi kukhanya kulomsebenzi omuhle owenzakalayo wokusebenza kwe Bulawayo Council le ministry of transport ukubana kuvuselelwe imigwaqo. Kuyisinqumo esihle esiletha intuthuko koBulawayo njalo kuyathakazelelwa ngabantu. Lokhu kuzenza ukuba abantu bahambe kalula, lokhu kuzanceda ukuba njengoba ikhansili yakoBulawayo ingela mali nxa uhulumende engenela ukuba imigwaqo ilungiswe yikho lokhu esikukhangeleleyo. Lokhu siyakwamukela njengezakhamizi zakoBulawayo.
Mthabisi Ndlovu isakhamuzi sakoBulawayo uthi imigwaqo eselizweni ayifanelanga ukuba ngeye lizwe elikhululekileyo.
“Isimo semigwaqo sibi nxa sikhangela imigwaqo yonke ifile ikakhulu kuside leMatabeleland asila mgwaqo kugcwele amagodigodi. Nxa usiya eNkayi yistrip thala lokhe yalungiswa nininini singakazalwa lathi.”
UMnu. Menelisi Gumede, esinye njalo isakhamuzi sakoBulawayo, uthi uhlelo lolu luhle sibili nxa imali ingasoze iphanjulwe.
“Ungananzelela imigwaqo eminengi sekungama pothole agcweleyo sokusenza ukuthi kube lengozi. Amathaya ayaphangisa ukuphela nxa upheld lolu selu lauched sikhangelela ukuthi lusetshenzwe kahle kungabi labantu abathatha imali ngendlela engaqondanga.”
Imigwaqo esifile koBulawayo ibikwa ingabe iyisilinganiso sokungamatshumi ayisikhombisa lanhlanu ekhulwini (75%), njalo ingalungiswa ngezigidi zamadola eMelika ezingamakhulu ayisikhombisa (USD$700 million).
Ngaphansi kohlelo lolu olufakwe nguhulumende olokulungisa imigwaqo olweEmergency Road Rehabilitation Programme Two kukhangelelwe ukulungiswa imigwaqo elitshumi ekupheleni kwalonyaka. Imigwaqo le igoqela uNdaba, Catherine Berry Drive, Nkulumane, Glenville, Lobengula Street, Chinamano, Netherby, Renkini, Woodville Road kanye le Cowdray Park-Hlalani Kuhle.