Kuyaxokozela emalokishini atshiyeneyo eGoli okulabanye abantu abaqhuba umkhankaso weOperation Dudula olenhlonso yokuxoshisa kwele South Africa abokuza abangelamaphepha aqondileyo.
Umqondisi womkhankaso lo, uMnu. Nhlanhla Lux Dlamini, utshele umsakazo weSABC namuhla ukuba abantu bokuza benza ukuganga okumangalisayo, okugoqela ubusela lokuthengisa izidakamizwa.
Ngakho-ke uthi sesifikile isikhathi sokuthi bephume bephele kwele South Africa. Kusanda kudutshulwa omunye wabo eSoweto obelihlekana labantu abangene ezindlini bedinga abokuza, okuthiwa batshontshe intambo zikagetsi.
UDlamini uthi ukubulawa komunye wabo kutsho ukuba sebezaluqinisa ngamandla uhlelo lokuxotshisa abokuza, okuthiwa bathatha njalo yonke imisebenzi yezandla lokunye kwele South Africa.
Kusanda kubulawa uElvis Nyathi, isizalwane seZimbabwe elokitshini leDiepsloot, ngabadabuka kwele South Africa, okuthiwa babedinga izigebengu. Sebedlela evalweni abanengi abadabuka eZimbabwe kulandela ukubulawa kuka Nyathi njalo lokuxokozela kwamanye amalokitshi eSoweto.
Kumele kwenziweni ukuze abantu bokuza bengakhahlanyezwa yizizalwane zakwele South Africa?
UMnu. Mbuso Ngwenya, odabuka eZimbabwe osehlale okwesikhathi eside kwele South Africa, uthi kumele uMongameli Cyril Ramaphosa loMongameli Emmerson Mnangagwa bexoxisane ngodaba lolu.
Lokhu kugcizelelwe nguMnu. Joseph Tshuma, okubandla leZanu PF, othi kumele abadabuka kwele South Africa ukuba bebekwazi ukuphila kahle labanye abantu loba kulezigebengu ezivela kwele Zimbabwe.