Kulezizalwane zakweleSouth Africa eziyisikhombisa ezimiswe phambi komthethwandaba kamantshi eRandburg lamhlanje zisetheswa icala lokubulala isizalwane seZimbabwe umnumnzana Elvis Nyathi owakhandwa ngamatshe watshiswa elokitshini leDiepsloot eJohannesburg.
Ngesikhathi abayisikhombisa laba bemiswa phambi komthethwandaba, umtshutshisi utshele umantshi ukuthi bekubotshwe abantu abalitshumi lane (14) kodwa bangabikhona ubufakazi obuqinileyo obuxhumanisa abayisikhombisa lecala lokubulala umuyi uNyathi.
Uthe abayisikhombisa laba betheswa amacala agoqela ukubulala ngenhloso kuhleliwe, ukuzama ukubulala, ukutshaya ngenhlozo yokulimaza, ukuthatha imali ngobuqili, lecala lokuthumba lokuzama ukuthumba.
Sebesebhokisini babuziwe ukuthi kungabe belawo yini amagqwetha azabamela kulelicala. Abane babo bathe bazazidingela amagqwetha kantike abathathu bacele ukudingelwa amagqwetha kahulumende.
Umantshi wethule isinqumo sokuthi abayisikhombisa laba bavalelwe bese besiza emthethwandaba ngoLwesihlanu sebelamagqwetha abo ukuze kukhulunywe ngendaba zokubhadala imali yesibambiso ibail ukuze icala lithethwe bephandle.
Ukubotshwa kwabayisikhombisa laba kwemukelwe ngezandla zombili yizizalwane zeZimbabwe zisithi kufanele bajeziswe ababulala uNyathi ngesihluku esikhulu.
Umgcinisihlalo weZimbabwe Community in South Africa umnumnzana Ngqabutho Mabhena uthi bemukela ngezandla zombili ukuthi sebekhona asebebotshiwe ngokubulawa kukaNyathi.
“Sizabe silandelela leli cala ngoba eqinisweni nxa kuyibo abakwenzayo lokhu kufanele bajeziswe. Kumele babe yisifundo kwabanye ukuthi lokho abakwenzayo yinto okungamelanga ukuthi bayenza. Kumele bagwetshwe ngoba imuli kaElvis Nyathi lathi izizalwane zeZimbabwe sibuhlungu ngendlela ahamba ngakhona.”
Isikhulumeli seviyo labatshutshisi kweleSouth Africa unkosikazi Phindi Mjonondwane Utshele iStudio 7 ukuthi baqinisekile ukuthi ababotshiweyo laba balesandla ekubulaweni kukamuyi uNyathi.
“Asithandabuzi ukuthi ababotshiweyo laba bayathinteka ekubulaweni kukaNyathi.”
Imuli kamuyi uNyathi ibingekho emthethwandaba. Omunye wezihlobo zababotshiweyo owalileyo ukukhuluma leStudio 7 ubekhonona esithi yindaba abezindaba beqakathekisa ukusakaza imfa kaNyathi kodwa bengatsho luthi ngokubulawa kwezizalwane zakweleSouth Africa yizigebenga ezicatshangelwa ukuthi yizizalwane zakwamanye amazwe.
UNyathi ufe ngokukhandwa ngamatshe lokutshiswa yizizalwane zakweleSouth Africa abezizingela abangelancwadi zokuhlala kweleSouth Africa lezigebenga lobanje baba labo ubufakazi bokuthi yena akusiye sigebenga. Kukhangelelwe ukuthi kuvele okunengi emthethwandaba ngoLwesihlanu ngesikhathi abayisikhombisa laba befaka izicelo zokuthi icala lithethwe bephandle kwentolongo.