Sekusele insuku ezingatsho lutho ukuthi eleZimbabwe linanze iminyaka engamatshumi amane lambili lathola uzibuse.
Umkhosi walonyaka wenzelwa koBulawayo, okungokwakuqala embalini yalelizwe selokhu lathola inkululeko yokuzikhethela umbuso owawuphansi kukahulumende weleBhilithani.
Ingcwethi ezicubungula ezombusazwe lenhlalakahle yabantu, zona ziveza ukuba lanxa ilizwe lathola uzibuse, kumqoka ukuba uzulu elizweni ayithole inkululeko uqobo ayilangazelelayo.
Omunye walezongcwethi kunguMnu. Masimba Manyanya waseGoromonzi, othi kulomehluko okhona phakathi kukazibuse lenkululeko.
“Uzibuse libala elisetshenziswa kulandiswa phezu kokuncindezelwa ngabelungu esikhathini esedlule. Inkululeko ikhuluma phezu kokwanelisa kwabantu ukuthi bafeze amaphupho abo kiso sonke isikhathi kungela kuvinjwa.”
Ekuvezeni kwakhe ukuba uzokwenzelwa koBulawayo umkhosi walonyaka wokuthakazelela uzibuse, uMongameli Emmerson Mnangagwa, uthi inkokheli yeZanu PF kanye lakuhulumende bakwenza lokhu ngenjongo yokusa imikhosi yaloluhlobo lenhlelo zikahulumende kundawana zonke zelizwe phansi kwezindoiso ezeDevolution ezimunyethwe yisisekelo sombuso welizwe.
Kodwa isiphathamandla sebandla eliphikisayo ele Citizens Coalition for Change, uMnu. Felix Mafa, uthi okumqoka okumele uhulumende akwenze, yikumanyanisa abantu hatshi ukubavala amehlo nje.
“Thina sikholwa ukuthi iZimbabwe sindawonye, asilandaba lomhlobo, asilandaba lokuthi ulombala bani, silendaba le-ideological difference, okokuthi siyavumelana yikho ke kumbe kuseMashonaland, kumbe kuseMidlands, kumbe kuseManicaland, kumbe kuseMatebeleland kumbe kuseMasvingo, singabantwana banye, asilabandlululo.”
Ukusa umkhosi wokunanza uzibuse koBulawayo uMafa uthi akuyikwenza uzulu walelodolobho akhohlwe lokho okwabehlela ngesikhathi sombhuqazwe weGukurahundi owabangela imfa yabanengi esigabeni semaNdebeleni laseNkabazwe.
“Inhlanhla yikuthi labo ababephatheke bebulala, iGukurahundi lokhe bekhona, incosana yakhona lokhe ikhona. U-Mugabe uze walala engazange adinge uxolo ekhumisane lathi umlotha. Nangu u-President okhona laye kalandeli isisekelo sombuso ukuthi into le ivalwe, ilungiswe, hayi benza ufeja feja ngamangcwaba labantu abafileyo.”
Lonyaka ilanga leIndependence Day linanzwa phansi kwendikimba ethi ‘Zim@42-Leaving no one and no place behind’.