Izakhamizi zeMatabeleland South zithi ukwehluleka kwamapholisa ukuthi abophe amasela ezifuyo kungabe kungesinye sezizathu ezibangele ukubulawa kukaMnu. Justice Ncube oweJohn West eGwanda obecatshangelwa ngumphakathi ukuthi ulesandla ekutshontshweni kwabobabhemi.
UMnu. Justice Ncube ubhubhe ngolweSihlanu kuviki edluleyo ngemva kokutshaywa kabuhlungu ngabahlali beMashaba phansi kweGuyu abedlula amatshumi amabili bencedisana lezizalwane zakweleBotswana ezazilitshumi lanye bemethesa icala lokutshontsha obabhemi.
Izakhamizi esixoxe lazo zithi sezileminyaka zitshontshelwa kungela nyathelo elithathwayo ukuze lawa amasela abotshwe ayepika ejele.
UMnu. Victor Sibanda oyisakahamuzi seManama njalo engutshalimana wenhlanganiso elwisana lokutshontshwa kwezifuyo eye Gwanda Anti-Stocktheft Association iGASTA uthi kukanengi bebamba xhaka amasela ezifuyo kodwa ayekelwe.
Ngokunjalo uMnu. Sibanda uthi kuyadingeka ukuthi amapholisa asebenze ngendlela eqondileyo ukuze kungabi lokulahleka kwempilo zabantu mahlayana nje.
UMnu. Lovemore Ncube oyisakhamuzi seMatobo uthi ukuyekethisa kwamapholisa ukubopha amasela ezifuyo sekudale ukufuthelana okukhulu kungakho izakhamizi zigcina zithatha umthetho ziwufaka ezandleni zawo.
UMnu. Ekem Moyo uthi ukwehluleka kwamapholisa ukuvikela izakhamizi kubatshiya besengozini kungakho izakhamizi kumele ziphume lamaqhinga okuzivikela.
UMnu. Amon Clinic Nyathi ngukhansila kaWard 10 eGwanda, uthi kukhona okunuka santungwana esipholiseni.
Isikhulumeli samapholisa uMnu. Paul Nyathi uthi uzulu kumele atshiyane lomkhuba yokufaka umthetho ezandleni zakhe kodwa abikele amapholisa lapho ethe waphatheka kakubi.
UMnu. Nyathi uthi basaluphenya udaba lokubulawa kukaJustice Ncube.
Umongameli Emerson Mnangagwa usebumbe ikomidi yeziphathamandla zikahulumende ezaphenya udaba lokutshontshwa kwezifuyo zakweleBotswana yizizalwane zakuleli.
Lokhu kuza ngemva kokukhalaza kukaMongameli wakweleBotswana uMnu. Mokgweetsi Masisi othi izifuyo zakibo ziyaphela ngenxa yamasela emngceleni wakweleBotswana leZimbabwe eMlambapheli.
