Iziphathamandla zikahulumende weleSouth Africa ziqhube umhlangano NgoLwesihlanu, lezakhamizi zelokitshini leDiepsloot eJohannesburg kulandela ukubulawa ngesihluku kwesizalwane seZimbabwe, umnumnzana Elvis Nyathi.
Umphathintambo wogatsha lwendaba zamapholisa umnumnzana Bheki Cele utshele izakhamizi ukuthi usebuyise ezinye imota zamapholisa ezedlula itshumi kuleli lokitshi kanye lamapholisa edlula ikhulu.
Umnumzana uCele uthe amapholisa azangena indlu ngendlu edinga abephula umthetho labaselizweni ngokungekho emthethweni.
“Siyawakhuza amapholisa kodwa sizowatshela futhi ukuthi angayeki ma ekusola ukuthi akwazi ukubuza besekuba sezandleni zakho ukuverifyer ukuthi unawo yini amadocuments. Ma ungawavezi amadocuments yinkinga ke leyo.”
Ngesikhathi umhlangano uqhubeka umphathintambo wogatsha lwendaba zasekhaya umnumnzana Aaron Motsoaledi ubhule omkhulu umlilo ngesikhathi izizalwane zakweleSouth Africa zifuna ukuhlasela isikhulumeli senhlanganiso yeZimbabwe Community in South Africa umnumnzana Bongani Mkhwananzi laye obengene kulo umhlangano.
Kudingeke ukuthi uMkhwananzi afihlwe emoteni yamapholisa ukuze avikeleke kulababantu abebefuna igazi lakhe uqobo.
“Lendoda ibizakubulawa, besizoba nesinye isidumbu phambi kwamaMinister amabili beselisenza umsindo lithi yindaba uhulumende engenzi lutho.”
Umnumnzana Thabang Molefe oyisizalwane sakweleSouth Africa uphefumule yonke inzondo alayo ngabokuza kodwa lenzondo ibiqondiswe kakhulu kuzizalwane zaseZimbabwe.
“AbaseZimbabwe bagcwele lapha bazenzela umathanda emigwaqweni yeDiepsloot, ngapha bangena endlini zethu sifuna abantu beZimbabwe bahambe yikho engikutshoyo.”
Lobanje izakhamizi ezingene lo umhlangano zisithi ziyasuthiseka ngendlela abaphathintambo abathembise ngayo, ezakwamanye amazwe zona zithi zisele zilokwesaba kakhulu.
Ezinye zezinto ezivunyelwene kulo umhlangano yikuthi amapholisa azangena indlu ngendlu edinga izigangi labaselizweni ngokungekho emthethweni. Kuvunyelwene futhi ukuthi izakhamizi ezipha abaselizweni ngokungekho emthethweni indawo yokuhlala lazo kuzafuze zibotshwe.
Inkosi yakwaMthwakazi UBulelani KaMzilikazi laye obekhona kulo umhlangano uthi isimo esiseDiepsloot sibi kakhulu kuzizalwane zakwamanye amazwe.
“Inzima indaba, isimo sibi kakhulu lapha eDiepsloot, insizwa yakwaNyathi le ebuleweyo isimo asisihlanga.”
Kusukela ngo 2008 eleSouth Africa lihlaselwe ludlakela lokubandlulana ngobuzwe, olweXenophobia kubangwa imisebenzi phakathi kwabakwamanye amazwe lezizalwane zakweleSouth Africa. Inengi lezizalwane zakwamanye amazwe kweleSouth Africa ngabeZimbabwe ababalekela ukuwa komnotho elizweni labo.
Selokhu kuqale lumnyaka, sekulamaqembu ahamba ezingela abokuza efuna baphume emisebenzini babuyele kubo, osekubangele ukuthi abanye bacine bebaleka lapho abahlala khona besiyacatsha enkambeni zamapholisa.
Kusenjalo imuli kaNyathi ithi unkosikazi wakhe uNomsa Tshuma usesusiwe eDiepsloot wayahlala kwelinye ilokitshi lapho abacabangela ukuthi uphephile khona. Imuli ithi izahlangana ngempelaviki ihlela ngokuyangcwatshwa kwakhe ekhaya kantike amapholisa athi akekho osebotshiwe ngalesisehlakalo.