Kuliviki kuhlelo Woza sileqembu elihamba ngegama lokuthi Imvunulo KaMzilikazi, elicula umdumo weAfro Jazz lisebenzela liseTsholotsho.
Inengi labaculi abadabuka kulumhlubulo bacula umdumo wetshibilika kodwa Imvunulo KaMzilikazi babuya ngomculo opholileyo.
Bamelwe nguMkhipheni Tshabangu ozalwa koNhlamba, eTsholotsho.
"Ngokuzalwa ngizalwa nguAmos Tshabangu Bezenia endaweni yakoNhlamba koTshabangu emzini omkhulu, umama laye enguMaMoyo ozalwa khona endaweni yase Tsholotsho. Ukufunda isikolo ngafunda endaweni yase Tshabanda isikolo esilaphana endaweni yako Nkunzi.
Umfana kaTshabangu selesikhathi ecula.
"Ezokuhlabela ngiziqale laphana ngomnyaka ka 2013 lapha engaqala khona leqembu leTshabungu Mapoko Sound ebelikhokhela nguFrance Ncube, uFrance Ncube laye ohlala khona ke laphana endaweni yase Tsholotsho ongumhlali wakhona. Ibizo lomculo lo esiwuculayo ubizwa ngokuthi Imvunulo KaMzilikazi owela ngaphansi kwe Afro Jazz. Ingoma lezi yingoma ezijule kakhulu njalo ezifundisa kakhulu ngendaba yesiko lakithi lapho esivela khona.”
Ziyakhipha siloMkhipheni leqembu lakhe le Mvunulo KaMzilikazi, uthi laye kulabaculi abamenza wangena kwezomculo.
"Okwangenza ngafuna ukuhlabela okwangi inspiyayo ngabantu abanjengo Alen Ndoda, obaboMadalaboy yibo abantu abangiphusha kakhulu kulezizinto zomculo. Kodwa kuthe ukuhamba kwezikhathi ngathola ke sokukhona laphana lami engizikhethela khona engikuthanda kakhulu okufana le Afro Jazz laphana engiyibone noma ngithi engikuthandele ngikubonela ebantwini abafana lobaba u Majaivana labantu abafana lobaMzwakhe Mbuli oHugh Masekela.”
Isikhathi silomona Tshabangu, abalaleli bengalithola ngaphi nxa befuna ukwazi ngezomculo wenu.
"Siyatholakala kuma social media ke wonke amapage lapho ongasilandela khona uyasithola Instagram, twitter ngitsho laku YouTube uthi nje Imvunulo KaMzilikazi uyakuthola konke okumnandi ngilithembisa mina ngithi ikhona ingoma esendleleni ke ikhona ingoma isingle laphana esendleleni.”
Besiphethe umculo wemvunulo KaMzilikazi bemelwe nguMkhipheni Tshabangu esesimkhipha sivala uhlelo Woza Friday.