Ibandla lePeople’s Democratic Party selixotshise kukhansili yako Bulawayo, uMnu. Arnold Batsirai, owangena kukhansili kwacaphuka abantu abanengi ababesithi kazami ngitsho lakancane ukukhuluma ulimi lwabantu abahlala edolobheni leli.
Uhlangothi lukahulumende oluphethe amadolobho namuhla lulobele uBatsirai incwadi lumazisa ukuba ibandla lakhe kalisafuni ukuthi amele uzulu kuWard 24. Ibandla leMDC-T lalo lisanda kuxotshisa abanye njalo abamele indawo ezitshiyeneyo lisithi kabalandeli imilayo yalo.
Amabandla la axotshisa amalunga edale lephalamende lamakhansili amanengi emadolobheni lemaphandleni esithi adlelana leMDC Alliance, elalikhokhelwa nguMnu. Nelson Chamisa. Abanye abasanda kuxotshiswa okwamanje, abagoqela uBatsirai, bacatshangelwa ukuba sebengene kubandla leCitizens Coalition for Change elikhokhelwa nguChamisa, elivotelwe ngabantu abanengi kukhetho lwama by-elections olwenziwe ngeviki ephelileyo.
Amabandla aphikisayo kukhanya engani kawenelisi ukusebenza ndawonye ukuze asuse ibandla leZanu PF embusweni.
Kusanda kwenziwa ukhetho lwama by-election, eyinye inkokheli yamabandla aphikisayo ithembise ukusebenza ndawonye ngesikhathi sokhetho oluzakwenziwa ngomnyaka ozayo. Kambe amabandla la angasebenza ndawonye na?
Ukuze sihlaziye udaba lolu, uGibbs Dube weStudio uxoxa loMnu. Bernard Bhekilizwe Ndlovu, ingcwethi kwezombusazwe ezimeleyo, loNkosazana Khethiwe Bhebhe, olandela ezombusazwe. UNdlovu uthi amabandla aphikisayo azakwehluleka ukubambana ngesikhathi sokhetho oluzayo.
UNdlovu uthi lokhu kuzakwenza ibandla elibusayo lihlale embusweni okwesikhathi eside.
UMaBhebhe uyakusekela lokhu esithi kungcono ilizwe liqunywe ukuze abantu bezibuse ezigabeni zabo.