Umkhokheli webandla lokholo eleRoman Catholic Church, uPope Francis, unxunsa ama-bishops umhlaba wonke okugoqela ele Zimbabwe, ukuthi bamanyane laye kumthandazo azawukhokhela ngoLwesihlanu emzameni yokuletha ukuthula phakathi kwabamazwe lwisanayo kumpi ephakathi kweleRussia lele Ukraine.
Lumthandazo uza ngesikhathi inkokheli emhlabeni ikhathazeke ngempi le. Limpi ibikwa isibangele umonakalo omkhulu elizweni laseUkraine lapho ibutho lakwele Russia lihlasele lelo lizwe kwabhidlizwa izakhiwo, kwabangela ukubhubha kwenkulungwane zabantu, ukulimala abanengi abanye abedlula izigidi ezintathu babaleka byapahephela kwamanye amazwe.
Esinye isiphathamandla ehlangothini lwezokukhulumisana kwelamaJesuits, uMnu. Kuda Matambo, ulandisa kabanzi ngokuqakatheka kwalemithandazo ebandleni lakhe lesiKatolika umhlaba wonke.
“Imithandazo yaloluhlobo yenziwa ngendlela yokuvusa umoya oletha ukuthula lokumisa impi ekhona phakathi kwabeRussia leleUkraine. Okwenzakalayo lokhu kuyinto eqakathekileyo kakhulu embalini yabeRoma ukuthi abamazwe kanye lendawo ezitshiyeneyo balendlela ebalulekileyo eqondiswe kumkhokheli wabo okufana lo IoMaria.”
UMnu. Victor Dube, isakhamuzi edosedolobho leHarare, engomunye wamakholwa ebandla leRoman Catholic laye usiphe imbono yakhe.
Bakhona abesabela ukuba impi le ephakathi kwele Russia le Ukraine ingaguquka ibe yimpi yesithathu yomhlaba, abanye bengabathi kungeke kwenzakala lokho.
Isikhulumeli sebandla eliphikisayo, ele People’s Democratic Party, uMnu. Nqobizitha Khumalo, upha umcabango wakhe phezu kwempi le ukuthi kungaphetha sekungeyomhlaba na loba hatshi.
“I-Russia le-China, angama womabili lawo mazwe, ngibona engazathi bayaba yi-block eyesabekayo kakhulu okokuthi umuntu uyabe elesibindi, yenalowo ukuthi engabaqala bona laba abantu ukuthi ebalwise. Angiboni esiba lalawo mandla kumbe laleso sibindi, kuzathobelwana sibili kodwa angiboni impi yelizwe lonke isenzakala. Umumo welizwe uzantshintsha, kuzaba le world order entsha phezu kwalokho kodwa angiboni betshayana laba bantu bona ngokwabo.”
E-Harare lumthandazo uzokwenzelwa eSacred Heart Cathedral ngokukhokhelwa ngu Archbishop Robert Ndlovu weHarare esebenzisana lommeli kaPope kuleli, uPapal Nuncio, uArchbishop Paulo Rudelli, ukuqhuba umthandazo weMass okhangelelwe ukuqala ngemva kwehola lesihlanu kusihlwa - 5:30pm, kusasa.
Inkokheli yalelibandla iveze njalo ukuba zizolandelwa ngokufaneleyo zonke iziqondiso zokuvikela igcikwane le coronavirus ezabekelwa amazwe ngabohlangothi olubona ngezempilakahle kumanyano wamazwe omhlaba i World Health Organisation kanye lezabekwa nguhulumende.