WASHINGTON DC – Ikhomishini ebona ngezokhetho, iZimbabwe Electoral Commission (ZEC), ithi ngamanga ukuthi yalise abazamela amabandla ezititshini zokuvotela, ama-polling agents, ukuthwala omakhalekhukhwini, amapheni lamaphepha kuma-polling stations lapho kuvotwa kukhetho lwamaby-elections ngoMgqibelo.
Inhlanganiso elwela amalungelo, iHeal Zimbabwe, yiyo eveze ukuthi ama-polling agents axwayiswe yiZEC emhlanganweni wokuwafundisa ukuthi azaqhuba njani umsebenzi eKwekwe izolo. Kodwa likhomishini yethule umbiko enkundleni yeTwitter isithi lawa ngamanga aluhlaza.
Ithe ama-polling agents avunyelwe ukuthwala amapheni, amaphepha lamathotshi okukhanyisa, kodwa ayitshongo lutho ngodaba lwabomakhalekhukhwini.
Likhomishini isolwe njalo ngabanye ngemva kokuveza ukuthi izadinda amabizo abantu abavotelwayo ngoMgqibelo ephepheni elilombala omhlophe lomnyama kuphela.
Lokhu kutsho ukuba lempawu zamabandla ezilemibala etshiyeneyo zizaphuma zingumbala omnyama lomhlophe kuphela.
Abanye bathi lokhu kulakho ukudida abanye abavotayo ngoba beyabe bekhangelele imbala ephawula amabandla abo. Isikhulumeli seZEC uMnu Jasper Mangwana wethule umbiko esithi akulamthetho obopha ikhomishini yakhe ukuthi idinde ama-ballot papers alempawu zamabandla ezihambelana lemibala yawo.
Kusenjalo likhomishini isikhuthaze uzulu ukuthi ayehlola amagama akhe ku-voters roll phamilini kokhetho ngoMgqibelo.
Isikhulumeli senhlanganiso ekhuthaza abantu ukuthi babhalisele ukuvota eyeEkhayaVote2023 uMnu Nkosikhona Dibiti utshele iStudio 7 ukuthi kubalulekile ukuthi abantu bahlole amagama abo, khona athi bayenelisa ukukwenza kubomakhalekhukhwini babo.
