Abesifazana abakunhlanganiso yeZimbabwe Council of Churches (ZCC) bathi bazovotela kuphela abasekela ukuthuthukiswa kwabesifazana lamantombazana kukhetho oluzayo.
Bethule lokhu ekhasini leZCC lokukhulumisana enkundleni yokuxhumana eyeTwitter ngesikhathi eleZimbabwe limanyana lamazwe womhlaba wonke jilelele ekunanzeni usuku oluqakathekisa imisebenzi yabesifazana olwe-International Women’s Day.
UNkosikazi Rosline Gwese, isikhulumeli sebandla lezombusazwe eleLabour Economists and African Democrats, uthi ngempela kumele kukhethwe inkokheli yabesifazana kuzikhundla ezitshiyeneyo lalapho kusiba ngabesilisa kube ngabaqhuba inhlelo ezithuthukisa abesifazane lamantombazana.
“Ukuthi u-2023 efika asihambeni siyevotela umuntu ongumama, sithi asivoteleni umama, even kuParliament sibili singena siku 50/50, ku-council, singene siku 50/50 even emakhaya ethu, sibe yi 50/50, siphile impilo e-right, sisithi ngo 2023, asihambeni sonke siyevotela obaba labomama abafuna ukubona umntwana oyinkazana engadlwengulwa, abafuna ukubona omama labo bephakama. Sithi sonke kasihambenini siyevota, sivotele abantu abanjalo, omama labobaba, abafuna ukuthi omama labo beke bephakame, abafuna ukuthi obaba labo beke bephakame.”
Uyawungcoma umbono wabe Zimbabwe Council of Churches uNkosikazi Gwese.
“Yikho libona i-party yethu thina silomuntu wesifazana and abantu besifazana bonke ebandleni lethu, baphiwe ama-positions aphezulu ukwenzela ukuthi lathi singabantu abangabafazi, siyakwanisa ukulibusa leli lizwe. Lathi njengabantu abangabafazi, siyakwanisa ukuphakamisa umntwana wonke ongumfana konke lamankazana, siyakwanisa ukubaphakamisa njengabomama. Omama abagcina abantwana kusukela mzana ezamzala umntwana eze ekhule sibili abe leyakhe imuli, usuka ezandleni zikamama.”
Umphathintambo wendaba zabesifazane lentuthuko yamabhizimusi amancane laphakathi laphakathi, uNkosikazi Sithembiso Nyoni uthi kunengi uhulumende asethe wakwenza okukhuthaza abesifazane lamantombazane ukuthatha izikhundla zobukhokheli enhlangothini ezitshiyeneyo zempilo okugoqela kwelwezombusazwe.
“Sibone ukuthi omama kuyini asebekwenzile, esingakulalazela. Ilizwe lethu linanzelele, ukuthi lokhe kungela kulingana phakathi kwabomama, lokhe kuhlukuluzwa, i-gender-based violence ilokhe iqansa. Sifuna ke ukuthi sibonisane phakathi njengesizwe ukuthi kuyini okuhlukuluza omama.”
Eyinye ingcwethi kwezombusazwe, uMnu. Mlungisi Dube, uthi ngumbono omuhle ovezwa ngabesifazane beZCC.
“Siyananzelela ukuthi omama benza i-population efika at least 50%, ngokufanayo kodwa siyananzelela ukubana ephalamende balutshwana kakhulu, okutshengisa ukuthi abaphiwa amathuba alinganayo kweze-politics. Umbono nje, uyabe ulungile kakhulu ukuthi uyenze ukubana bekwanise ukuthi bethole ukumela abameli babo abakwanileyo nxa bengama ngelizwi elifananayo kungayenza ukuthi bephathiseke.”
UMnu. Nqobizitha Khumalo, isikhulumeli sebandla lePeople’s Democratic Party, uthi kumele uzulu eZimbabwe afunde ukwemukelana hatshi inzondo esebantwini athi yiyo eyenze abanengi ikakhulu abesifazana besabele khatshana ukuphatheka kunhlelo zombusazwe.
“Kufuze kube labathi ngesilungu, i-paradigm shift, kube lesigaba okuthiwa khona, hayi lokhu kakume. I-language ye-hatred esikhona kuZimbabwe izalumathisa umlilo, ngoba sinje ngabantu abahlezi endlini bele petrol, bele paraffin, bele gas kodwa sidlalisa umentshisi. Kufunakala nje oyedwa ozaklwebha nje kuhle kudubuke kube ngumlilo. Ngoba i-hatred ekhona ku-social media, abantu abanengi ngale ngaphandle khonale, bayathethisa, bayathuka. I-language yona leyo kayilunganga.”