Abadabuka eZimbabwe abafisa ukwethekelela kwele Botswana kodwa bengafuni ukuhlatshwa ijekiseni yokuzivikela kuCOVID-19, sebezabhekana lemigoqo emitsha ngemva kokuba eleBotswana liqinise imithetho kwabangena elizweni yeziqondiso zokumelana lobhubhane lolu.
EleBotswana liqinise imthetho yalo yezempilakahle eyePublic Health Order, ngokugcizelela ukuthi izethekeli kumele zitshengise ubufakazi bokuthi zihlatshiwe ijekiseni yeCOVID-19.
Labo abangahlatshwanga balakho ukuhlatshwa ijekiseni le, kungela mbadalo emngceleni, kodwa abangafuniyo bazakwalelwa ukungena kwele Botswana.
Umthetho okhitshwe ngoLwesihlanu, uhulumende weBotswana uthi kodwa labo abazatshengisa ubufakazi bokuthi akumelanga behlatshwe ijekiseni, bengavunyelwa bengene.
Lokhu kuza ngesikhathi inhlanganiso ezimela ilungelo loluntu zikhala ngokuthi ngesinqumo sakhe, uhulumende weBotswana usebamba ngamandla ukuthi abantu behlatshwe ijekiseni yeCovid-19.
UMnu. Thapelo Ndlovu, oweCommunity Media Foundation uthi akukho emthethweni ukwalela umuntu ukuthi angene elizweni uma engafuni ukuhlaba ijekiseni.
“Ungakhuluma ngezinye indlela zokuthi abantu behlabe, kodwa ukuthi walele abantu ukungena elizweni ngenxa yokuthi abahlatshwanga, akukho emthethweni.”
Inyathela leBotswana lilakho ukulimaza inengi leZimbabwe ikakhulu abaphila ngokuthenga bethengisa imphahla.
UNkosazana Debra Mukasa, isiphathamandla senhlanganiso yeBulawayo Vendors and Traders Association, uthi uma kulomthetho kwele Botswana, kumele ulandelwe.
“Kumele sikubone sikuzwisise ukuthi yinto yomhlaba wonke, njalo savuma ukuthi uma kumele sisebenze kumele sizilandele lezo ziqondiso. Akuhlatshelwa bani, kodwa kuhlatshelwa wena ukuthi uvikeleke.”
UMukasa uqhubeke esithi kungalimaza ikakhulu abenkolo ezingahambelani lokuhlatshwa.
“Singazi kulalabo abalenkolo ezitshiyeneyo, uma lesisinqumo singahambelani lawe, sekumele udlalele khatshana. Njalo ngibonile ukuthi uma ulesiqiniseko sokuthi akumelanga uhlatshwe kumele utshengise ubufakazi.”
Kusenjalo, eleBotswana lithi kubuyiselwe eZimbabwe izidumbu ezidlula amakhulu amathathu (305) nyakenye.
Owezempilakahle emngceleni weRamokgwebana, uNkosazana Kenanao David uthi kunani leli, abalikhulu babebulewe ngumkhuhlane weCovid-19.
UNkosikazi Soneni Dube, okubhizimusi yokuphathisa imuli ngesikhathi sokufelwa, uthi isimo seCovid senze ukuthi kubenzima ukuthi bahlawule imali zemfa ngenyanga ngenyanga.
“Inani lehla kakhulu ngoba abantu baphelelwa ngumsebenzi. Kubakuhle ukuthi uma usengangeni uyenelise ukuba le-funeral scheme, ukuthi isimo singehla uyabe ukwazi ukuthi uzayenelisa ukuthola imali.”
Kulenani eliphezulu elicina lingcwatsha kweleBotswana izihlobo zisehluleka ukuhlawula indleko zokubuyisela isidumbu ekhaya.
Lonyaka akukhangelelwanga ukuthi kubelezidumbu ezinengi ngesikhathi iCOVID-19 isidedile, njalo inengi kwele Botswana selitholile ijekiseni yokuzivikela kumkhuhlane lo.