Izakhamizi zakoBulawayo ziyala ukwamukela umthetho okhangelelwe ukwethulwa nguhulumende, osahlaziywa okwamanje, ozalawula ukusebenza kwenhlanganiso ezizimeleyo owePrivate Voluntary Organizations (PVO) Bill.
Zithi lokhu kuzaphazamisa usizo abaluthola kunhlanganiso ezizimele zodwa.
Lokhu kuvele lamuhla emhlanganweni wabekomiti yedale lephalamende eyeParliamentary Portfolio Committee on Public Service Labour and Social Welfare loBulawayo ebihlose ukuzokuzwa imibono yabantu ngokuphathelane lokusebenza kwenhlanganiso ezizimele zodwa.
IPVO Bill yethulwe edale lephalamende ngabeZanu PF ngoLwezi womnyaka ophelileyo, besithi uhlose ukulawula ukubhalisa inhlanganiso ezizimeleyo kanye lokuzenqabela ukuba ziphatheke kwezombusazwe.
Izakhamizi zakoBulawayo zikuveze sobala ukuthi azivumelani leziqondiso zeBill leli zisithi ukungenela kukahulumende kuzakwenza ukuthi inengi liswele usizo.
Umnumzana Sondlwane Dube umhlali wakoBulawayo uthi uhulumende uhlose ukuthathela uzulu amandla okuyinto engavunywa yisisekelo sombuso.
“I Bill leyi nxa sikhangele ama principles awe accountability ngiwabona eright but indlela abayibeke ngayo yiyo e wrong. Indlela abayibeke ngayo ngeyokuqinisa amandla omunye oyedwa okuhulumende kukanti i-constitution iya divider amandla phakathi kukahulumende lama institutional akhe. Nxa sekusenziwa so uhulumende uba lamadla amanengi selakho ukuxotsha noma ngubani. Ibill leyi kumele ithathe isikhathi ku consulter kuqala.”
UNkosikazi Wayne Dube ophuma kunhlanganiso yabantu abakhubazekileyo uthi akungaguqulwa umthetho okhona ngoba inhlanganiso ezizimele zodwa zibaphathisa kakhulu ukwedlula uhulumende.
“Thina njengabantu abakhubazekileyo besisebenzisana le Ministry of social welfare kodwa asikaze sibone okubambekayo okusuka kibo sicina sithola usizo kuma PVO. Sicine sitshiyana labo abe ministry leyi ngoba izinto zabo zi slow. Banika usizo ngokuthi ungubani wena, ungowe party yiphi njalo izinto zabo zenzakala eHarare. Ama PVOs lawa ayasinika imisebenzi, thina njengabantu abalama disabilities asitholi ukuqhatshwa ngoba kulokukhangelelana phansi. Thina sithi abame kancane uku amender ibill leyi sisebenze njengokuthi besisebenza njani.”
UNkosikazi Busi Masina, isakhamuzi seMagwegwe Old koBulawayo, uthi kayisiyo mfihlo ukuthi uhulumende kenelisi ukuphathisa uzulu.
“Ngisebenza kakhulu labantwana abangamankazana labo mama, bethola kakhulu uncedo kuma NGOs. Kulezi insuku ngilabantwana abayi 425 abancediswayo yiNGO. So uhulumende engathi ufuna ukuthatha kumbe ama NGO abe phansi kwakhe kuyayenza ukuthi abantwana abanengi baswele uncedo ngapha yena ngokwakhe uhulumende wsehluleka ukugcina abantwana laba.”
UMnu. Nehemiah Choluwa, umhlali wakoBulawayo, uthi abameli abafakwa nguhulumende kabafezi injongo yabo yokumela abantu.
“Uhulumende ubelabantu akade abathemba kakhulu ukuthi bangamela. Kodwa sananzelela ukuthi ama minister amanengi balobungundlu, abasakhangeli lokhu abakulandileyo ukumela abantu. I PVO bill izakwenza ukuthi abantu badubeke. Lanxa ama NGO elobudlwangudlwangu lapha lalaphana kodwa besanelisa ukuthi baphathise abantu.”
Laloba inengi likazulu lingathakazeleli iBill leli, umnumzana Victor Ncube umhlali wakoBulawayo ulombono owehlukileyo. Yena uthi uhulumende lenhlanganiso ezizimele zodwa kumele baxhasane ngoba belenjongo eyodwa yokusebenzela abantu.
“Ngifisa ukuthi iBill leli liphumelele ngoba umsebenzi wama NGO injongo yawo le government ngeyodwa ukusebenzela abantu. Inkinga ekhona kuma NGO yikuthi banika ama youth imali yokuthenga utshwala kulokuthi babancedise bakwanise ukuzenzela eyabo imali. Kungani imali zeNGO zingahlanganiswa leze government kuncediswane. Singaqala phansi sibale i Bill leyi sizathola ukuthi i-government ilengqondo ebalulekileyo njalo futhi i good for abantu.”
Amalunga ekhomithi yedale lephalamemde awePublic Service Labour and Social Welfare enqabe ukuthatshwa amazwi bethi balande ukuzolalela uzulu hatshi ukukhuluma. Kodwa imihlangano eyenziwe ngable ikomiti yephalamende ngaphambilini eHarare laseRusape ibikwa imiswe ngamalunga ebandla leZANU PF.