Izakhamizi zeZansi yemaNdebeleni sezidlela evalweni kulandela ukungani kuhle kwezulu kumaviki amathathu adlulileyo osekutshiye izilimo zitshile. Kumaviki amabili adlulileyo abalimi abaxoxe leStudio 7 babike ukuthi bakhangelele inala kodwa lokhu sekuthe kwaguquka kulandela ukuguquka komumo yomkhathi.
Inengi labalimi esixoxe labo kumaviki amabili adlulileyo belethemba lokutshata inala kodwa sebelahle ithemba lesivuno esihle ngenxa yokungani kwezulu lokutshisa kwelanga.
Ke sizwe imbono kaMnu Lovemore Ncube ongomunye walabo abakade belethemba lesivuno esihle.
Sekufika phose amaviki amabili kungela zulu endaweni ezitshiyeneyo zeZansi yemaNdebeleni.
UNkosikazi Siphathisiwe Nkala oweSilikwe eGwanda North uthi okwamanje isimo sesiguquke saba sibi emasimini.
Amazwi la agcizelelwe nguMnu Joseph Khumalo owakoMtshazo othi lanxa abanye bezathola inengi lizabhekana lendlala.
UKhansila kaWard 13 eGaranyemba uMnu. Miclas Ndlovu uthi inengi selilahle ithemba lesivuno esihle lonyaka.
UMnu. Mkhunjulelwa Ndlovu osaphethe isihlalo somqondisi wogatsha lwezokulima uthi abalimi akumelanga batshaywe luvalo esithi izulu liyeza.
Ukhuthaze abalimi ukuthi bahlakulele izilimo zabo.
Kusenjalo uhlangothi olubona ngezamanzi olweZimbabwe National Water Authority solwazise umanisipala weGwanda ukuthi selufake imitshina yokubhadla kuqala, amaprepaid water meters, edolobheni leGwanda okuzadala ukuthi umanisipala aqale abhadalele amanzi engakawathengiseli izakhamizi.
Isikhulumeli seZinwa UNkosikazi Marjorie Manyonga uthi iGwanda ilesikwelede esikhulu.
Inengi lezakhamizi lithi lesabela ukuthi lokhu kuzadala ukuthi zihlale zingelamanzi ngoba umanisipala ehlezi ekhala ngemali.