Kuyaqhubeka ukuxokozela kugatsha lwezemfundo kwele Zimbabwe ngesikhathi ababalisi abafundela umsebenzi labasanda kugqiba izifundo sebebhalisa ukuba baphiwa imisebenzi ngabekhomishini eqhatsha izisebenzi zikahulumende eyePublic Service Commission.
Ikhomishini le ithi ababalisi abangabuyanga emsebenzini izikolo zivulwa sebehle bazixotshisa umsebenzi.
Lokhu kuza ngemva kokuba umthethwandaba weHigh Court unqume ukuba ukuxotshwa kwababalisi nguhulumende ngenxa yokutshengisela kwabo ngokungayi emsebenzini akukho emthethweni.
Kodwa ababalisi abasafundela lumsebenzi labasanda kugqiba izifundo bathi balindele ukuya emsebenzini ngamehlo abomvu, besithi loba yiliphi ilanga bengaqala okwenze bahle bagijimela ukuyabhalisa ukuze bathole umsebenzi.
Omunye wabo nguNkosazana Rachel Sibindi osanda kugqiba izifundo zokuba ngumbalisi.
“Sesizabhalisa amabizo ethu. Yenaleyo encane siyayifuna. Siyaphila ngayo leyo mali. Abangafuniyo asikhulumi labo, kabatshiye umsebenzi sizakuya khona.”
Uqhubeke ethi loba nje iholo lilincane kibo iyenela ngakho-ke bazimisele ukuqala ukwenza umsebenzi loba kusasa.
“Thina esikufunayo ngu msebenzi. Nxa sisemsebenzi siyaphilisa imuli zethu ngayelo encane eyabe ikhona.”
Kodwa inhlanganiso ezimela ababalisi zithi okwenziwa nguhulumende kulakho ukuphazamisa isimo semfundo elizweni ngoba ababalisi laba bengelalo ulwazi olweneleyo.
Isikhulumeli seARTUZ, uMnu. Thembakuye Moyo, uthi bazaqhubeka benkankasela iholo elingcono kulalelo abalitholayo manje njalo ababalisi abasanda kugqiba izifundo bangeke benelise umsebenzi.
“Singakunanzelela uhulumende ukhuluma ezombusazwe thina sikhangele umsebenzi wethu. Kukhanya engathi kabazwisisi ukuba abakwenzayo kuphazamisa abantwana.”
Kodwa munye umbalisi uNkosikazi Nesisa Dube ofundisa kwesinye isikolo eHarare uthi sebebuyela emsebenzini bekhokhonona esithi babona engani inhlanganiso ezibamelayo sezibaphazamisile.
“Njengababalisi sesibuyelile emsebenzini. Isizatho kungasikho ukuthi sesabe ukuxotshwa. Saxotshwa ngo Lwesihlanu lweviki edluleyo. Iholo esasilikhangelele asilo esiliphiwayo.”
Imizamo yokuthola imbiko kugatsha lweze mfundo yehlule, kuthi izisebenzi zogatsha lolu zithi intathelizindaba kazisebenzise imbiko ekhitshwa yilologatsha eyokuba lowo ongayanga emsebenzini ngeviki ezayo uzaxotshwa.
Umphathintambo wogatsha lwe mfundo yePrimary leSecondary, uNkosikazi Evelyn Ndlovu kuviki edluleyo ukhiphe umbiko othi ababalisi bonke abatshengiselayo sebexotshiwe umsebenzi okwenze inhlanganiso yababalisi eyeARTUZ iye emthethwandaba ukuyahikisa leli nyathela.
Loba nje idale lethe lokhu akukho emthethweni, uhulumende uqhubeke esithi uzaxotsha bonke ababalisi abangayanga emsebenzini kusiya fika umhlaka 22 Nhlolanja. Ababalisi bebetshengisela ngokungayi emsebenzini selokhe izikolo zavulwayo lonyaka kusukisela mhlaka 7 Nhlolanja.
Uhulumende ubengeze iholo ngesilinganiso samatshumi amabili ekhulwini - 20% kumadola eZimbabwe, waphinda wapha izisebenzi zakhe ingxenye yaleli holo ngekhulu lamadola eMelika-US$100 phezu kwamatshumi ayisikhombisa lanhlanu-US$75 yokusebenza ngesikhathi se Covid-19.