Inyathela leBotswana lokuvumela abahlabe ijekiseni yeCovid-19 ngokugcweleyo ukuthi bangene elizweni kungekho isidingo sokuthi behlolwe ukuthi abalagciwane leli, sekwamukelwe ngenjabulo yizihambi ezinengi. Inengi ebelihamba ikakhulu phakathi kweZimbabwe leBotswana kade likhala ngemigoqo ekhona eyafakwa kuyindlela yokuvikela ukumemetheka kweCovid-19.
Kodwa kulandela ukwesula kwesidingo sokuhlolwa ukuthi umuntu akala gciwane leCovid-19 uma engena kweleBotswana, inengi lithi sekuzakuba ngcono kundleko zohambo.
IBotswana ibike ngoMgqibelo ukuthi abahlatshwe ngokupheleleyo, ijekiseni yeCovid-19, bazangena emngceleni kungela sindingo sokuhlolwa iCovid-19.
Umnunzana Dumezweni Ncube uthi lokhu kuzatsho ukuthi abantu bazahamba lula uma kuqathaniswa lesikhathi kusadingakala ukuthi abantu behlolwe iCovid-19 bengakavunyelwa ukuchapha imngcele.
“Aqondile amanyathela athethwe yiBotswana leZimbabwe. Sesifikile isikhathi sokuthi uma abantu beqhubeka behlatshwa ijekiseni yeCovid-19, kuvulwa ezinye izigaba njalo kuyekethiswe ezinye iziqondoso ezifana leze PCR test. Besekudula ukuthi abantu bechaphe imngcele ngenxa yeziqondiso kanye lezidingo zeCovid-19.”
EleZimbabwe lalo libike ukuthi imngcele isizavulwa, ngemva kwesikhathi eside ivaliwe ngenxa ye Covid-19.
Inengi eliphila ngokuthenga imphahla eBotswana lisiyathengisa ekhaya lithi lezi zindaba ezimnandi.
Abafana lomnunzana Rodwell Moyo bathi bekunzima ukuletha imphahla yabo kweleBotswana kodwa ngokuvulwa kwemingcele kanye lokuyekethiswa kwezinqondiso ngeleBotswana, sekuzaba ngcono.
“Kuyinto ejabulisayo, amabhizimusi ethu kade esesifa. Njalo siyamukela inyathela leBotswana uthi kumiswe ukuhlolwa iCovid-19 ngoba bekubuyisela emuva inhambo zethu.”
Kodwa umphathintambo wezempilakahle kweleBotswana, udokotela Edwin Dikoloti uthi uyakhathazeka ngencwadi zokuzibazela ezitshengisa ukuthi abantu bahlatshiwe ijekiseni bona bengahlatshwanga.
Uthi impendulo ekuqedeni uhlupho lolu, yikuba lencwadi eziphekwa ngumtshina ezingeke zabazeka lula.
“Sizaqala ukuba lencwadi ezikhitshwa ngumtshina ukuze siyesule udubo lokuthi abantu bezibazele incwadi ezitshengisa ukuthi umuntu uhlatshiwe. Ludaba okumele siluhlanganele singamazwe atshiyeneyo.”
EleBotswana lithi izihambi ezingahlatshwanga, zizaphiwa ijekiseni mahala emngceleni. Abokuza abangafuni ukuhlatshwa kumbe ukuhlolwa iCovid-19 kabasoke bavunyelwe ukungena kweleBotswana.
AbeBotswana bona bazahlawuliswa inkulungwane ezinhlanu zamaPula (P5,000) kumbe bevalelwe umnyaka ejele uma bephikisana leziqondiso ezintsha.
EleBotswana selihlabe ngokugcweleyo abedlula kancane isigidi esisodwa(1,1million) asebehlatshwe ijekiseni yokuzivikela kuCovid-19 ngokugcweleyo njalo lilamajekiseni aphose afike izigidi ezinthathu (three million) alinde ukusetshenziswa.
