Osakhulayo waseGwanda owathunjwa wabulawa ngenyanga eyedlulileyo umzimba wakhe watholakala suwonakele ngoLwesihlanu ngemva kwamalanga ayisitshiyagalolunye, ubekiwe emangcwabeni alelidolobho ngoLwesithathu.
Inengi labakhulume emngcwabeni bebekhala ngokuthi abasahlalisekanga ngobugebengu osebukhona eGwanda ngakhoke abomthetho sokumele babophe ziqine.
Inengi licabangela ukuthi uThembani Moyo angabe wabulawa wakhitshwa ezinye izitho zomzimba ukuze zisetshenziswe ekuthaketheni. Abasolwa ababili sebebotshiwe njalo bamiswe phambili komthethwandaba ngoMvulo besetheswa icala lokubulala.
Inengi ebelithe gwaqa esontweni yeSebata elokitshini leSenondo lihlengezele inyembezi lapho uyise kaThembani , uMnu Marvelous Moyo elandisa okwenzakale kusukela ngelanga indodana yakhe inyamalala kusiyafika lapho itholakala singamathambo.
UThembani ubikwa walandwa ngumngane wakhe kumaviki amabili adlulileyo emcela ukuthi amphelekezele endaweni zeWest Nicholson ukuze abuye setshayela imota eyayifele khonale njalo wambhadala amadola eMelika angamatshumi amane-US$40.
Bathe besehla ezitolo zeMbembesi kwathutsha eyinye imota okwaphuma khona amajaha athile amdumela amfaka emoteni basuka ngesiqubu ngomgwaqo oqonda eBeitbridge kwahle kwaba yikho ukunyamalala kwakhe.
Ugogowakhe, uNkosikazi Effie Sithole ,uthi njengomndeni badabukile kakhulu.
Umakhelwane, uNkosikazi Maretha Dube, uthi kukhona okunuka santungwana kuloludaba.
Umngane kaThembani, uDumolwenkosi Dube, abakade behlabela bonke uthi sebedlela evalweni.
Ukhansila kaWard 5, uMnu Gilbert Dube, uthi uzulu kasahlalisekanga ngobugebengu osebukhona.
UMbiko Masuku waseMatshetsheni uthi kuyadingeka ukuthi abomthetho babophe ziqine.
UThembani ufe eleminyaka engamatshumi amabili lanhlanu yokuzalwa kukanti abasolwa ababili sebebotshiwe besetheswa umlandu wokumbulala.