Ibandla leMDC Alliance ngoMgqibelo liqhubeke ngohlelo lokukhulumisana lozulu wesigaba seMasvingo kungakhathalekile lezahlakalo ezenzakale ekuqaleni kwayonale iviki kulesi sigaba.
Ingcwethi kwezombusazwe ezikhulume le Studio 7 zithi izehlakalo zodlakela ezenzakele kuliviki ziveza sobala ukuba ibandla le ZANU PF lifuna uksuebenzisa udlakela ukuvimba amabandla aphikisayo, ikakhulu ele MDC Alliance, ukukhakhansa emakhaya.
Zithi ukhetho luka 2023 luzakuba nzima ukwedlula olumnyaka ka 2008 lapho okwafa abantu abanengi ngemva kokuba ibandla le ZANU PF linqotshwe ekhethweneni lwamalunga edale lephalamende, kwasekusiba lokhetho lwesibili, irun-off, phakathi kuka muyi uMnu Robert Mugabe lo muyi uMnu Morgan Tsvangirai.
UTsvangirai wacina etshiya ukuncintisa kulolokhetho ngenxa yodlakela lolu.
Enye yalezingcwethi, uMnu Mlungisi Dube uthi okwenzakale eMasvingo kuveza sobala ukuba ibandla le ZANU PF lizimisele ukwenza loba yini ukuba linqobe ukhetho.
Lokhu kugcizelelwe ngu Mnu Mlindelwa Mancitshana laye oyingcwethi kwezombusazwe othi umnyaka ka 2023 uzakuba nzima ngoba ibandla le ZANU PF selehlulekile ukutshengisa ukuba lizimisele ukulungisa umumo welizwe.
Enye njalo ingcwethi, uMnu Pride Mukono uthi kuza kuba nzima kumabandla aphikisayo ukuba akhankase emaphandleni ngoba ibandla le ZANU PF lizasebenzisa udaba lwezijeziso zomnotho ukudinga usekelo.
Kodwa umsekeli wesikhulumeli sebandla leMDC Alliance, uMnu Felix Mafa uthi njengebandla bazimisele ukumisana lodlakela lwe ZANU PF esithi ibandla lakhe yilo elilabantu.
Ibandla le ZANU PF lithi abe MDC Alliance baqamba amanga ukuba elizweni kulodlakela lisiti benza lokhu ukuze umhlaba usole ele Zimbabwe uchothoze ukhetho lona abathi iMDC Alliance izanqotshwa nzima.
Abanye bathi ukuqhamuka kodlakela lolu kwenziwe ngendlela yokungcolisa ibandla leZanu PF ngoba isikhonzi somanyano weUnited Nations sikhangelelwe ukufika kumalanga amalutshwana azayo ukuzohlola indubo ezingaba zibangelwa yizijeziso zenotho.
Umsekeli kanobhala oqoqa inhlelo zebandla le ZANU PF kugatsha lwabatsha uMnu Mabutho Moyo uthi iMDC Alliance iqamba amanga ukuba kulodlakela elizweni.
Inani labantu abaya embuthanweni kaMnu. Chamisa eMasvingo likhulu kakhulu kodwa ngesikhathi esedluleyo abanengi abaya emhlanganweni le abavoti. Kuzakuba lomehluko na kukhetho oluzayo?
