Inani labantu asebehlatshwe ijekiseni le Covid-19 eZimbabwe selifika izigidi ezimbili ngesikhathi igcikwane le coronavirus selibhahile elizweni. Abantu abanengi kade bemadolonzima kunyenga ezedluleyo bebesemizeleni yokuhlatshwa endaweni ezehlukeneyo namuhla.
Loba nje abantu laba bephansi kakhulu kulenani labantu abafika izigidi ezilitshumi-10 million okukhangelelwe ukuthi bahlatshwe ukuze ilizwe livikeleke kubhubhane lwe Covid 19.
Uhulumende uthenge amajekiseni afika izigidi ezimbili le ngxenye- 2.5 million ekupheleni kwenyanga edluleyo.
Amanye amajekiseni akhangelelwe ukufika elizweni ayisigidi esisodwa okutsho ukuba kuzahlatshwa abantu abathe xaxa.
Ekhuluma ekuqaleni kwayonale iviki uMongameli Emmerson Mnangagwa ukhuthaze uzulu ukuba ahlatshwe amajekiseni e Covid-19 esithi yiyo yodwa indlela yokuzivikela kulolu bhubhane.
“ Lumkhuhlane lokhe usasekhona. Lokhe sibona inani labantu ababalumkhuhle, lababhubhayo liqansa. Ngikhuthaza umuntu wonke elizweni ukuba alandele iziqondiso ze WHO leziqondiso ze lockdown esazibekayo”
UMongameli ukhuthaze uzulu ukuthi ahlatshwe njalo alandele leziqondiso zokwenqabela ukumemetheka kwegcikwane le coronavirus.
“ Sifuna ukuthakazelela uhlelo lokuhlatshwa kwabantu, olwabekwa logatsha lwezempilakahle. Abadala kumele bonke bahlatshwe, ngoba singenza njalo siyavikela imuli zethu lendawo ezihlala kuzo emkhuhlaneni lowu”
Lokhu kugcizelelwe ngomunye uDokotela weze mpilakahle uDokotela Garry Shava yena othi kumele uzulu aqhubeke elandela iziqondiso ze WHO ezikhuthaza ukuqhelelana, ukugeza izandla lokugqoka ama mask.
“ Sikhangele lo mkhuhlane osumemetheke umhlaba wonke, sikhangele lamazinga esenzakele kuleli, wonke umuntu kumele agqoke imask, ngoba lumkhuhlane uyathelelwana nxa umuntu ethimula, ekhwehlela kumbe ekhuluma”
Kumalanga ayisikhombisa kusukela kuviki edluleyo ngolwesihlanu kuze kufike kuviki yonale ngolwesine kwahlatshwa abantu abafika 349 948 okulinani eliphezulu ngeviki eyodwa nxa kuqathaniswa le nyanga ezisanda kwedlula.
Ingcwethi kwezempilakahle zicabanga ukuba izinga lesine kumbe level 4 lokulwisana le Covid-19 sokenze umumo waba nganeno lanxa zisithi kusesekhatshana ukuba abantu bakhangelele lumkhuhlane phansi.
Ngesikhathi inani labantu abagula lumkhuhlane lisiya likhuphuka, sekulabantu abanengi ababhubha ngalumkhuhlane kulabantu abangatshumi asiyitshiyagalolunye lanye-91 ababhubhileyo izolo, kutsho ugatsha lwezempilakahle.
Lolugatsha luthi kulabantu abedlula inkulungwane ezimbili, 2 265 ababanjwe leligcikwane kumanani awethulwe izolo.
Isigaba se Harare esilabantu abangamatshumi afika phose amane, 38, ababulewe yi Covid 19 izolo, silobunzima obukhulu ingcitshi ezithi kungabe kubangelwa linani labantu abanengi kakhulu abahlala kuleli dolobho lamanani ababanjwa leligcikwane ephezulu kakhulu.
Umkhuhlane we Covid-19 usubulele abantu abafika phose inkulungwane ezintathu 2961 elizweni kusukela ngo Mbimbitho nyakenye.
