EleZimbabwe kunye lamanye amazwe angomakhelwane sebevumelane ukungenele kwele Mozambique ukulwisana labahlamuki besiMoslem abedlulisa amalawulo asebebulele abantu abanengi inkulungwane lenkulungwane zabaleka emizini yazo okwesatshelwa ukuthi lobu budlwangudlwangu bungacaphakela kumazwe angomkakhelwane abalisa leZimbabwe. Lokhu kuphume emhlanganweni we SADC Troika lapho uMongameli Emmerson Mnangagwa ubekhona laye labomongameli bakwele South Africa, Botswana lele Mozambique.
Lumhlangano uthi uthole imibiko yokuhlukunyezwa okwenzwa omama labantwana ngabahlamuki laba.
Lumhlangano uphinde wathi kumele kube lomunye njalo umhlangano mhlaka 28 wayonale inyanga ozahlela ukuba amazwe eSADC angenele njani kwele Mozambique.
Kulembiko ethi asebebulewe ngabahlamuki laba sebesedlula inkulungwane ezimbili, 2 600 kuthi abafika phose isigidi esisodwa, 670 000 sebedinga ubuphepheli.
Abahlamuski laba besebehluthune ingxenye yedolobho le Palma.
Ekhuluma le Studio 7 uRtd Kennel Buster Magwizi omele abalweli bempi ye nkululeko abalwa bekuviyo le ZPRA uthe okwenziwa yinkokheli ye SADC kulungile ngoba kule mithetho yalumanyano ethi kumele amazwe la avikelane.
“ Kasingakuthathi kalula lokhu. Kuzayuka ngokuthi bavumelana okungakanani, ngoba amazwe lawa asebenza njendlela ezanceda umhlubulo lo, njalo lezwekazi le Africa,” kutsho uMagwizi.
Ocubungula ezombusazwe uMnu Freedom Mazwi uthi kumele amazwe wonke azwele uzulu we Mozambique usizi njalo ukungenela kwe SADC kuuze kube yikuvikela uzulu we Mozambique.
“ Masikhangeke isimo esise Mozambique ngibona ingazani iSADC kumele ingenele, ngoba abantu abanengi sebeyisiphepheli besilizweni labo. Ibutho le Mozambique selitshengise ukuba ngeke likwenelise lilodwa,” kutsho uMazwi.
Lokhu kusekelwe ngu Mnu Marvelous Khumalo owe nhlanganiso ye Crisis in Zimbabwe Coalition yona ethi ele Zimbabwe kumele lincede ele Mozambique.
Umvukela ose Mozambique ngowabahlamuki abalobudlelwano le benhlagnaniso yamalwa ecatsha yakwele Iraq le Syria eye ISIS owaqala ngo mnyaka ka 2017 kodwa kumaviki ambalwa asanda kwedlula abahlamuki laba bavuke eseganga bahluthuna idolobho le Palma ngo Mbimbitho esigabeni se Cabo Delgado sona esilamafutha ezimota alenotho efika US60 billion enjiwa yi nkampani ye Total eye France.
Embikweni wayo iSADC ibike ukuba ikhathazeke kakhulu ngokuhlaselwa kwe Cabo Delgado ikakhulu ukungahlaliseki kwezizalwane zakulelolizwe.
Umhlangano lo ubizwe ngu Mongameli wakwele Botswana uMnu Mokgweetsi Masisi yena ongumgcinisihlano wogatsha lwezokuzivikelwa kwala mazwe olwe Organ on Politics, Defence and Security Coorperation.
Amanye amazwe angamalunga ogatsha lwe Troika ngele Zimbabwe elalingumgcinisihlalo kunyanga ezedluleyo, lele South Africa elizaba ngumgcinisihlalo kunyanga ezilandelayo.