Amalunga ebandla leMthwakazi Republic Party lenhlanganiso ezitshiyeleyo bebetshengisela lamhlanje esigodlweni seZimbabwe ePretoria kwele South Africa bekhonona ngokuhlukuluzwa kwamalunga abo lokuncindezelwa kwezabelo zeMatabeleland.
Abephume ngobunengi amalunga ebandla leMRP ephethe inqwaba yezikhalazo ezibhekiswe kuhulumende weZimbambwe.
Isikhulumeli saleli bandla umnumnzana Velile Moyo nguye owethule izikhalazo lezi kuziphathamandla zomeli weZimbabwe kweleSouth Africa.
“Sikhangele ukuthi uhulumende kufanele athathe inyathelo ngendaba yeGukurahundi. Sikhangele izinto zeland, sikhangele futhi ukuvalwa kwamaborder, sikhangele ukumiswa kwama taxi drivers koBulawayo kufakwa uZupco, kulethwa amabhasi avela eHarare kusiba yiwo azosebenza koBulawayo lamadrivers ebuya enjalo. I MRP9 ebotshiweyo kufanele ukuthi ikhululwe ngokushesha. Amademands lawa sifuna ukuthi ayenzakale njengoba sikhuluma kanje. Kuyekelwe futhi ukuhlukunyezwa abantu bakithi politically abantu baphiwe ipreference yoku excesayizaa amaright abo kuhlanganisa ukuthi bekele ukuhlukumeza umkhokheli weMRP uMqondisi Moyo,” kutsho uMoyo.
Lelibandla lithi amalunga alo eZimbabwe asephilela evalweni olukhulu kanti akhululeka kuphela engangena kweleSouth Africa. Lithi udaba lweGukurahundi sekufuze lukhulunywe kungakhathalekile ukuthi uhulumende uyafuna loba akafuni.
Ilunga lelelibandla unkosazana Zanele Mguni uthi sebediniwe ngokuhlupheka emazweni bebalekela uncindezelo elizweni labo.
“Esikhundleni sokube sisekhaya sibheke izingane zethu sibheke imizi yethu kodwa nanku siyahlupheka sisemazweni ngenxa yokuthi ilizwe lethu alikhululekanga asinakho ukuthula. Okubuhlungu kunakho konke ngendaba yeMatabeleland lucuku esihlangana lalo iforced immigration. Silapha asithandi sifisa ukuba sekhaya kodwa singaba sekhaya sizokwenzani? Ayikho imisebenzi nale imisebenzi ekhona ithathwa ngabanye abantu bakwezinye indawo manje sebethatha iland. Angisayiphathi indaba yokufeyila kwabantwana ezikolo abaseMatabeleland,” kutsho uMguni.
Zinengi inhlanganiso ezidabuka kweleMandebeleni ebeziyingxenye kwalokhu kutshengisela.
Umnumnzana Nkosinodumo Khumalo uthi konke sekuzanyiwe kwehlula ngakho sebefuna ilizwe labo abalitshiyelwa yinkosi uMzilikazi.
“Njengabantyu bakwaMthwakazi sifuna e2 state solution. Ayikho enye into esisayidinga, 2 state solution. IMashonaland ayihlale yodwa uMthwakazi ahlale yedwa yiyo into esiyifunayo. Bahluphekile abantu akula solution. Siyatshontshelwa amaresources ayathathwa left right and centre so, 2 state solution is what we want kuphelela lapho,” kutsho uKhumalo.
Umnumnzana Mbuso Ngwenya obemele inhlanganiso yeOperation Free Mthwakazi laye ubetshaya phansi ngentonga ethi sebehlupheke kwenela.
“Sithi thina ugovernment weZimbabwe akayeke ukuhlukumeza abantu bakithi sekwanele manje ngoba lamanje lama bail lawa alokhu ekhitshwa okungaphelileyo sesenele ngawo. Umlayezonje esimnikeza wona yikuthi ma engasoze alalele lokhu esikucelileyo okuzolandela kuzofana laye,” kutsho uNgwenya.
Umculi weZimbabwe odumileyo umnumnzana Sebenzani Mqolo laye ubekulokhu kutshengisela esithi uhulumende weZimbabwe akayekele ukubopha lokuhlukuluza abantu abasebenzisa ilungelo labo lokutshengisela.
“Abantu kumele babe lamalungelo. Abantu kumele benelise ukutshengisela ngaso sonke isikhathi phansi kukahulumende wedemocracy. Lokhu esikubona kusenzakala eZimbabwe kuyakhombisa ukuthi ilizwe leliya alilademocracy. Abantu akade betshengiosela bengela violence kodwa lamanje baboshiwe, basejele asazi ukuthi bazokhululwa nini.”
Iziphathamandla zehofisi kameli weZimbabwe zalile ukuphuma esangweni lesigodlo zakhetha ukwamukela ugwalo lwezikhalazo lolu ngezikhala zesango. Le yinto ethukuthelise kakhulu inengi labebetshengisela laba.
Kodwake lezi ziphathamandla zithembisile ukuthi ugwalo lolu zizalusa kuhulumende weZimbabwe ukuze kutholakale impendulo.
