Kudaba olutshiye abantu abanengi bekhuza umhlola, uhulumende uthi ikomidi yedale lephalamende ebona ngezemithetho izabuthanisa uzulu ezigabeni ezitshiyeneyo zelizwe kuqala mhlaka 15 kulinyaka kusiyafika mhlaka 19 isizwa imbono yakhe ngokuguqulwa kwesisekelo sombuso welizwe okuzanywa libandla elibusayo phansi kweConstitutional Ammendment No 2.
Inengi lithi kudida ingqondo ukuthi uhulumende ugijimelani khona kulengozi yegciwane leCoronavirus. Uzulu uthi ukubuthaniswa kwabantu lokhu kuzabangela ukuthi igciwane leli limemetheke ngamandla.
Ukuguqulwa kwesisekelo sombuso lokhu kusolwa ngabanengi abathi ibandla leZanu PF lizama ukupha uMongameli Emmerson Mnangagwa amandla aphindiweyo.
Ingaphumelela linguquko, uMnangagwa uzaba lelungelo lokukhetha abahluleli bemithethwandaba lomtshutshisi omkhulu engakhulumisananga lamuntu.
Uzaba njalo lelungelo lokukhetha abaphathintambo bakahulumende abanengi ukwedlula labo abavunyelwayo phansi komthetho okwamanje.
Kulemigqa engamatshumi amabili lasikhombisa uhulumende afuna ukuyiguqula kusisekelo sombuso lesi esipasiswe nguzulu weZimbabwe ngesilinganiso phose sokungamatshumi amahlanu lanhlanu ekhulwini, 94,49 percent ngo2013 kukhetho lwe-referendum.
Sixoxe lesiphathamandla senhlanganiso yeRural Communities Empowerment Trust uMnu Vumani Ndlovu yena othi imbuthano kahulumende le izabangela ukumemetheka kweCoronavirus.