Inani lemizi edinga ukuphathiswa ngokudla eMatabeleland South selikhwelile laya phezu kwenkulungwane ezilikhulu lamatshumi amane, 140,000.
Ugatsha lukahulumende olubona ngokunakekela uzulu oswelayo olweSocial Welfare luthi ukuvalwa kwelizwe ngenxa yegciwane leCoronavirus ngokunye kwezinto ezibangele ukuthi inani labalambayo ezansi yeMandebeleni likhuphuke.
Ekhuluma kuliviki umqondisi wogatsha lolu kulumango uMnu Criswell Nyakudya uthe imizi esidinga ukuncediswa ngokudla isiphezu kwenkulungwane ezilikhulu lamatshumi amane, 141, 659.
Kodwa uthe imizi ethola uncedo oluvela kuhulumende okwamanje ingaphansi kwenkulungwane ezingamatshumi ayisikhombisa 68, 380.
Izakhamizi esixoxe lazo zithi ngempela kuliqiniso ukuthi igciwane leCoronavirus lenze indlala yabahlasela ngamandla.
“Ukhansila uzamile sibili yabuya iCare, imile okwensukwana. Uyazi besisidla kodwa okwamanje sikhuluma sinje akulalutho sebevalelisile,” kutsho isakhamuzi seMawane uNkosikazi Siboniso Nyathi.
“Ngabe kuyavuma kube lenye idonor engasilethela ukudla lanxa bengasinika umsebenzi bethi yenzani lokhu singavotela ukuthi sikwenze ngoba singafelwa ngabantwana ezindlini.”
Amazwi kaMaNyathi agcizelelwe nguMnu Godwin Magwala oweDatata.
“Lapha siqondane lendlala embi, izinto zikhwela ukusa kwamalanga, ungaphuma esitolo uthi uyabuyela uyafica into sikhwelile wena uyithenge ngeyinye iprice ephansi kukhwela nje ungena emnyango,” kutsho uMnu Magwala.
