Induna uMasuku oweMatshetsheni uthi kuzamele kuvele obala okubulele amalunga amathathu omdeni munye eMatshiya abhubhe elandelana kuviki ephelileyo ngemva kokukhala ngezisu.
UMasuku uthi lumonakalo sutshiye inengi lezakhamizi zithithibile, abathathu laba kucatshangelwa ukuthi bengabe bafakelwa itshefu.
Laloba uhulumende evimbela ukuhlangana kwabantu abanengi kulezinsuku ukuze kwenqatshelwe ukumemetheka kwegciwane leCorona Virus akekho obengavimba izakhamizi zeMatshetsheni ezize ngobunengi ukuzokhala ndawonye lemuli yakoSibanda elahlekelwe ngabazukulu ababili kanye lokhulu wabo kuviki eyedlulileyo.
Abazukulu bakaMnu Jotham Vikizonke Sibanda ababili abaleminyaka yokuzalwa engaphansi kwesitshiyangalombili babhubhe belandelana ngoLwesine langoLwesihlanu kuviki ephelileyo ngemva kokuthwalelwa esibhedlela bekhala ngesisu.USibanda laye obeke walaliswa esibhedlela yena kubikwa eqaleke wabhubhe lapho izidumbu zabazukulu bakhe zifika ekhaya ngoLwesihlanu ntambama.
Ekhuluma eseMatshiya izolo,lapho kubekwa uSibanda izolo , induna yeMatshetsheni uMnu. Mbiko Masuku uthi bamandolonzima ngalumonakalo.
"Besilapha kuphela leliyana iviki kulondolozwa abantwana , siyathandaza ukuthi uNkulunkulu abaqinise abemuli aziqinise izihlobo zikwamukele lokhu okwenzakaleyo sithandaza njalo futhi ukuthi nxa kunguye uNkulunkulu akukhethileyo lokhu kuqondile kunjalo kodwa nxa kulesandla somuntu phakathi sithandaza kuye futhi uNkulunkulu ngoba yena kacatshelwa lutho ukuthi akhanyise kubonakale ukuthi kwenzakaleni lapha ekhaya, ayilula lindaba," kutsho uMasuku.
UMasuku ukhuthaze izakhamizi ezilo dletshana ngalokhu okwenzakaleyo ukuthi bakuveze obala ukuze izakhamizi zihlaliseke.
"Lamuhla kungabe ingani akwazakali ukuthi kwenzakaleni kodwa engikwaziyo mina yikuthi kukhona osekuthethwe kwathunyezelwa eHarare ukuthi kuyecutshungulwa ukuthi kwenzakaleni kungenzakala ukuthi ngeviki ezayo amaresults ayabe sephumile, kodwa bonke abantu abalapha bayesaba kathesi akula muntu ongatshiya ukudla ekhitshini avuke ekudla kusasa akuyisiyo mpilo leyo so siyabe sisenzela ukuthi kungayazakala abantu bakhululeke baqhubekele phambili bephila impilo yabo," kutsho uMasuku.
UMnu John Magutshwa okhulume emele imuli yakoSibanda uthi badabukile enhlinzweni zabo ngalumonakalo obehleleyo.
"Kungizwise ubuhlungu kakhulu okokuthi lakathesi kungizwisa ubuhlungu okokuthi ngabe kwabekezela kwathatha isikhathi kumbe kuhambe oyedwa loba belandelana kwakungaba ngeyinye indlela hatshi ukuthi ngelanga ngingcwabe abantu ababili ngisithi ngisakhangele abantu ababili ngiphinde ngingcwabe futhi omunye hayi kungiphathe kubi kakhulu, kodwa konke lokhu ayisikho ukuthi ngingabethela isikhumba sakhona emuntwini kodwa ngibethela kuNkulunkulu ngisithi uNkulunkulu uyakwazi," kutsho uMagutshwa.
UMnu Asset Phiri uthi uphelelwe ngalokhu okwehlele umakhelwane wakhe.
"Uyazi ngibuhlungu vele angilalamandla okokuthi ngiswele lokuthi ngingathini ndaba yonke inkemenkeme le iqalisa ekhaya uyazi umakhelwane wami uViki ebegijima." kutsho uPhiri.
UMnu Mgoli Dube obengumngane omkhulu kaSibanda uthi iisigaba seMatshetsheni silahlekelwe kakhulu.
"Angikholwa ukuthi ukhona ozavala isikhala sikaViki kuyonale indawo yakithi yeMatshetsheni phezulu kwendlala enkulu kangaka lomumo omubi kangaka uViki nguye kade elamulela abantu , woza Viki ngilethole lami uzongithathela ungiphathele ukudla uyagijima uViki uyalithatha lelothole masinyazana imali yakhe iyabuyela angazi lamhlanje sizayaphi." kutsho uDube
USibanda utshiye umkakhe labantwana abathathu.Ababili balabantwana uKhohliso loCollen ngamaphahla ayiyo abhujelwe ngabantwana kodwa kabenelisanga ukuzobabeka ngenxa yokuvalwa kwemngcele kubangelwa yikuqhamuka kwegciwane leCorona Virus.
Amaphahla la kanye lodadewabo uRumbidzai athumele umbiko wendunduzo kunina.
"Mama qina qhawekazi lethe akula omunye osesibhekile nguwe kuohela, uyakwazi uthixo akwenzele lokhu asiwuthwaleni lumthwalo sonke," kutsho uDube.
Imuli yakoSibanda kanye lezakhamizi zeMatshetsheni zikhala zilethemba lokuthi kuzavela ngeyinye imini okuthethe abathathu laba.
