Umphathintambo wezemali, uMnu. Mthuli Ncube uthi amankampani athwelenzima ngalesi sikhathi sokuvalwa kwelizwe azaphathiswa phansi kwesikhwama esizasungulwa kunsukwana ezilandelayo.
UNcube wethule lamazwi ngoMvulo ngemva kokwethekelela isibhedlela se Kusileni ko Bulawayo lesikolo se Midlands State University eGweru.
Kodwa bakhona abakhonona ngemizama kahulumende eyokuphathisa uzulu ngalesi sikhathi besithi imizamo yakhona iphelela eboyeni njengezithukuthuku zenja.
Kumaviki ambalwa asanda kwedlula uhulumende wazise ukuba useqalisile ukuphathisa abantu abaswelayo labaphila ngokuthengisa ezitaladeni ngemali kodwa kuze kube namuhla abanengi belokhu beyibuza limali.
Usomabhizimusi wako Bulawayo, uMnu. Edwin Ndlovu, olilunga lebandla leMDC Alliance uthi okunengi ngemizamo kahulumende eyokuphathisa uzulu kuphuma emaphephandeni kuphelele khonapho:
Lokhu kugcizelelwe yisakhamuzi sako Bulawayo, uMnu. Raymond Phiri ongezelele sathi sizoyicela isivuthiwe.
Isikhulumeli sebandla leMDC Alliance ko Bulawayo, uMnu. Swithun Chirowodza laye ngomunye wabathi imizamo kahulumende kayisiyo eqotho.
Umphathintambo wezemisebenzi lazuli, iPublic Works, uMnu. Paul Mavima ucebise amankampani ukuthi engaxotshi izsebenzi ngalesi sikhathi sokuvalwa kwelizwe.
