Izakhamizi zemaphandleni sezikhuthaze uhulumende ukuthi aqale uhlelo lokuhlola uzulu igciwane leCorona Virus ngobunengi ukuze kubelesiqiniseko senani lalabo abahlaselwe yilumkhuhlane.Inengi lithi alikholwa ukuthi kuliqiniso ukuthi akukabi loyedwa ohlaselwe yileligciwane eZansi yemaNdebeleni.
Inengi lezakhamizi kulesisabelo esixoxe lazo zithi lokhu zihlalele evalweni ngomkhuhlane weCOVID 19 kungenani lembiko yabezempilakahle eveza ukuthi akula ngitsho loyedwa eZansi yemandebeleni osehlaselwe yilumkhuhlane.
Abezempilakahle sebehlole abantu abangamatshumi amathathu lasitshiyangalombili kuphele kulesisabelo osekutshiye inengi licabanga ukuthi bakhona abahlaselwe yilumkhuhlane kodwa bengakahlolwa.
UMnu Naison Nkala isakhamuzi seGwakwe phansi kweNduna uMathema uthi basemnyameni ngaleligciwane.
"Lapha kithi asikezwa ukuthi ikon kumbe kayikho ngoba akula muntu ohloliweyo so singathi kayikho kanti into le ikhona, esingakuthso yikuthi asilaqiniso kumbe into le ikhona kumbe ayikho besifisa ukuthi nga kuyatester abantu kube labantu abathestiweyo so sihlala evalweni singabantu abatshona ezindlini siphuma nje kancane sibuyele ezindlini , siyesaba ngoba bathi umkhuhlane lo uyabulala," kutsho uNkala.
Amazwi akhe agcizelelwe njalo ngesinye isakhamuzi seGwakwe esikhethe ukwaziwa ngokuthi nguNcube othi uhulumende kumele abhode ngezindawo ehlola abantu leligciwane leCorona.
"Mhlawumbe nga bekulendlela zokubani uhulumende angenelisa ukuthi kukhutshwe abantu abangahamba ngezigaba kuhamba kuhlolwa abantu ukuthi babuthane endaweni ezinje abantu abahlolayo bafike bahlolahlole imikhuhlane mhlawumbe bengathola ukuthi phakathi kwethu bakhona abangaba lento enjengayonaleyo," kutsho uNcube.
Osakhulayo uEdson Masuku uthi kuyadingeka ukuthi uhulumende athuthukise ezempilakahle ukuze izibhedlela zonke zenelise ukuhlola leligciwane, hatshi ukuthi lokhu kwenzakala koBulawayo leHarare kuphela.
"Siyabe sifona ukuthi nga kuyaba lomtshina okhona ezibhedlela eziseduze eGwanda kumbe eMtshabezi ukwenzela ukuthi kungaba lomuntu ongezwa kuhle simgijimisele khonangale etest ebone manje lapha eduze akulamitshina yakhona okokuthi umuntu engaze egule siyamhambisa eGwanda kumbe eMtshabezi kodwa imitshina akula ngitsho," kutsho uMasuku.
UNkosazana Sakhile Nyathi uthi ukuvalwa kwelizwe okweLockdown sekulethe njalo ubunzima kulabo abaphila ngamaphilisi angatholakali emakilinika lasezibhedlela zemaphandleni okufake njalo impilo kazulu engozini.
"Kunje esibhedlela akulamaphilisi abantu bayabe befuna ukuyadinga amaphilisi eGwanda noma eMtshabezi kunzima ukuthi abantu bahambe ngenxa yomumo okhona kthesi, banengi abanatha amaphilisi eBP banengi abanatha amaphilisi atshiyeneyo so besicela uhulumende ukuthi ancedise kakhulu ukwenzela ukuthi lalapha eMtshabezi lathi sibe lamaphilisi ukwenzela ukuthi lanxa kuleLockdown yonaleyi lanxa singayanga eGwanda siye eMtshabezi ngenyawo ngoba siyakwanisa ukuhamba," kutsho uNyathi.
Laloba uhulumende sethe kwehliswe intengo yempahla ezitolo uNkosazana Margarete Mkandla uthi lokhu akukayenzakali.
"Izinto siyazithola ezitolo kodwa ziyasidurela ngoba lamhlanje impuphu siyithenga ngemali ebuhlungu itshukela basibalisela i2kg $120 iCooking Oil $170 thina sifisa ukuthi nga izinto ziyehla sithole ukudla sihlezi ndawonye umkhuhlane lo uze uyelapheke uphele," kutsho uMkandla.
UNkosazana Getrude Mhlanga oweGohole uthi laye kakholwa ukuthi kakho loyedwa osetholakale lalegiwane kulesisabelo njalo uthi kuzamele iLockdown iqhubekele phambili kuze kube lesiqiniseko sokuthi lumkhuhlane awusekho.
"Kungabe kungaqinisekanga ngoba asika test lumkhuhlane ngali Lockdown mina ngokubona swami ukuthi iqhubekele phambili kumbe imiswe kudinga ukuhlolisisa ukuthi ukuba khona kwayo kwehlisa ukumemetheka kwalumkhuhlane ngoba nxa kusehlisa ukumemetheka kwalumkhuhlane akulancedo lokuthi sigijimele ukuthi ayimiswe kuvulwe kumele sinakekele impilo zethu," kutsho uMkandla.
Sebengamatshumi amabili lasitshiyangalombili asebetholakale belegciwane leCorona Virus kuleli labulala abane.