Izakhamizi ezinengi eMatabeleland South zithi sezihlalela evalweni kulandela ukuqhamuka komkhuhlane woqhuqho, iMalaria, wona osubulele abantu abayisithupha kulumhlubulo.
Lokhu kwenzakala ngesikhathi ilizwe libhekane lokumemetheka kweCoronavirus.
Okudanisayo yikuthi lanxa abantu bengaze bephiwe ama-mosquito nets, abanye babikwa bewasebenzisa njengamambule okuthiya inhlanzi lokwakha izilugu zenkukhu.
Abogatsha lwezempilakahle bathi asebebulewe luqhuqho laba bagoqela abane abahlala eBeitbridge, oyedwa oweBuvuma lomunye oweNhwali, eGwanda South.
Abafika phose amakhulu ayisitshiyagalolunye bahlaselwe yilumkhuhlane njalo inengi labo ngeleBeitbridge. Ezinye izigaba ezibhekane laloludubo zibalisa iInsiza, iMangwe, iUmzingwane kanye leMatobo.
Umkhuhlane woqhuqho awuvamanga kakhulu emangweni weGwanda, kungakho inengi lezakhamizi lethukile.
Ukuhlasela kwawo ngasikhathi sinye lomkhuhlane weCoronavirus kudale ukuthi abanye becabangele ukuthi abafayo laba babulawa yiyo iCoronavirus. Kodwa uhulumende uthi akunjalo.
UNkosikazi Eveline Ncube oweBuvuma ngomunye wabakhalayo ngemva kokubhujelwe ngumntanakhe obeleminyaka yokuzalwa engamatshumi amathathu lasithupha kuviki edlulileyo obesemba igolide kumfula uMzingwane.
UMaNcube uthi baphuza ukuyafika ekilinika becabanga ukuthi ubulawa yinyongo. Bathe sebesiyafika umkhuhlane usuxhwalile badluliselwa eGwanda ngemva kokuba baye koBulawayo lapho umntanakhe abhubhele khona.
“Sithe sesifika ngale bathi iMalaria leyi isikhwelile ivele iyakhwela uphuzile bekumele abuye ngelanga lesithathu eqalisa kumbe elesibili yena uze wabuya gelangt lesine elesihlanu iyabe sikhatshana so bathi uphuzile,” uMaNcube utshele umsakazo weStudio 7.
Sixhumane njalo lesinye isakhamuzi seBuvuma uMnu Morgan Dube osuka koMajiya, yena oke wahlaselwa yilumkhuhlane kuviki edlulileyo.
“Ngathi ngisiyadinga amadonki ami ngezwa umzimba awuyenzi, wababuhlungu wonke ngatshaywa likhanda ngathola lokuthi esiswini sami sokugodola ngaphakathi,” kutsho uDube.
“Kwala ukuthi ngidle, ngithe ngivuka ekuseni ngahle ngayabona uVillage Health Worker wangihlola igazi wathi yiMalaria. Ngaya esibhedlela basithi uyenze kuhle wagijima, bahle bangelapha.”
Loba abezempilakahle besithi bathatha amanyathelo okuvikela abantu afana lokubapha ama-mosquito nets, inengi liwasebenzisa okunye hatshi ukuvikela imiyane, kutsho uNkosikazi Gladys Moyo Manala yena obona ngezempilakahle esigabeni.
“Abanye bayakha izilugu zenkukhu ngayo sibili sesike saba lakho silandelela sibuza silekomidi esayikhethayo kumaCommunity Health Clubs ukuthi basincedise. Abanye bayabamba inhlanzi abanye benza izilugu zenkukhu.” kutsho uMaMoyo.
