EleZimbabwe linanze ikhefu leRobert Gabriel Mugabe National Youth Day ngoLwesihlanu abasakhulayo abahlala emakhaya bekhala ngokomelwa yimpilo ngenxa yokutshabalala komnotho.
Inengi labasakhulayo emaphandleni litshona libhoda ngezitolo ngenxa yokuswelakala kwemisebenzi okudala ukuthi abanye bahugwe yizidakamizwa.
Omunye wabasakhulayo laba uZenzo Dube ohlala eFumukwe uthi kumele uhulumende asungule inhlelo ezizabangela ukuthi benelise ukuziphilisa lanxa bengasebenzi.
“Ngabe i-government iyasinceda kakhulu ngokusinika uhlelo olufana lolokufuya inkukhu, imbuzi lenkomo ngoba nginanzelela esikhathini esinengi sihlangana lobugebengu obubangelwa yikuswelakala kwemisebenzi,” kutsho uDube.
UMthulisi Tshabangu osuka eSitezi yena uthi intanga yakhe icina iphatheka kubungebengu ngenxa yobunzima bempilo kulezinsuku.
Ngokunjalo, uthi uhulumende kumele athathe amanyathelo wokulwisana lokuswelakala kwemisebenzi emakhaya.
“Sinanzelela ukuthi abantu abatsha yibo abagcwele ezinkambeni ababotshiweyo ngenxa yokuswelakala kwemisebenzi basuke balingeke badale amacala,” kutsho uTshabalala ekhuluma leStudio 7.
Abantu ezansi yeMandebeleni bathi inhlelo zikahulumende kazifinyeleli kulumango lanxa behlezi bebhalisele ukuphatheka kuzo.
Abatsha abayisilinganiso esilitshumi ekhulwini eZimbabwe yibo kuphela abasebenzayo.
Ukhansila weFumukwe UMnu Ephraim Nyathi uthi abatsha bacina bechapha imingcele besiya emazweni angomakhelwane abalisa iSouth Africa leBotswana ukuyadinga impilo engcono.
“Kuqakathekile ukuthi abantwana babe lama-projects, kungabancedisa futhi ukuthi bengayeqi imingcele besiya kwamanye amazwe ngoba bayabe sebelakho okokwenza,” uNyathi utshee iStudio 7.
Usikhulumeli sabatsha kubandla leMDC eZansi yemaNdebeleni UNkosazana Senzeni Maphosa yena uthe intsha yemaphandleni isemnyameni ngalelilanga njalo iyabandlululwa kunhlelo zikahulumende ezinengi.
Kutsho uNkosazana Maphosa: “Sidinga ukuphakanyiswa ngenhlelo ezehlukeneyo ezingenza lathi siphatheke kwezenotho.”
Inengi lithi uhulumende weZanu PF nguye odale ubunzima obuselizweni ngokwehluleka ukuvuselela umnotho lokwehluleka ukuqeda inkohlakalo.
Kodwa uhulumende yena uzivikela ngokuthi izijeziso ezetheswa iziphathamandla zakhe lamankampani alobudlelwano leZanu PF ngamazwe afana leMelika yizo ezibhidliza umnotho.
