Izakhamizi ezinengi ezansi yeMatabeleland zithi kazisoze zenelise ukuhlawulela abantwabazo esikolo lonyaka ngoba izifuyo ebeziziphilisa ngazo, ikakhulu inkomo, sezathanyelwa yindlala.
Uhulumende uthi indlala ibulale inkomo ezedlula inkulungwane ezingamatshumi amabili eMatabeleland North laseMatabeleland South lonyaka.
“Njengoba lenkomo ebesizithembile ukuthi zizafundisa abantwana zife zaphela kutshengisa ukuthi abantwana laba bazahlala phansi ngoba lemali yakhona sizwe kuthiwa ikhwele yaya phezulu,” kutsho isakhamuzi seMagedleni uMnu Willis Gumbo.
“Akula lancedo esizalubona ebantwaneni ukuthi sincediswe ngodaba lwendlala ngoba umntwana ngeke ahambe esikolo elambile.”
UMnu Gumbo wengeze wathi kuyadingeka ukuthi uhulumende afundise abantwana abasezikolo zemfundo yaphansi eye-primary kungela mbhadalo.
“Sifisa ukuthi kusukela kuGrade 1 kusiya kuGrade 7, uhulumende ancedise kungabi lokubhadala kuwonalo umnyaka njengoba kulobunzima,” kutsho uGumbo.
Amazwi kaGumbo agcizelelwe yisakhamuzi seGaranyemba uNkosikazi Beauty Dube yena othi kasoze enelise ukuyithola limali yesikolo ngoba inengi kakhulu.
“I-School fees siyadula, amabhuku wona angikhulumi, ama-yunifomu konke kuyadula. Sizawathatha ngaphi thina ama$1,000 bond lawo afunakalayo? Kutsho uMaDube.
Abanye abazali babikwa sebesuse abantwababo ezikolo zama-boarding ukuze bafunde besuka emakhaya abo.
