Sokuqhamuke ukufuthelana edolobheni leUpington, esabelweni seNorthern Cape kweleSouth Africa lapho izizalwane zakulelolizwe ezithi abantu bokuza kumele baxotshwe kulandela ukubulawa kwelinye ipholisa ngoLwesithathu.
Lanxa amapholisa engakatsho ukuthi umsolwa obotshwe phezu kwecala leli yisizalwane sangaphi, izakhamizi zithi abokuza bonke kumele baphume baphele ngoba yibo abadala amacala.
Lanxa kulokufuthelana, umsakazo weSABC uthi bekungakabi lodlakela.
Ukuhlaselwa kwabantu bakwamanye amazwe kweleSouth Africa yinto esihlala isenzeka njalo bakhona ababuleweyo nyakenye.
Umsekeli kaMongameli walelolizwe uMnu David Mabuza ukhuthaze inzalo yeSouth Africa ukuthi ihlalisane kuhle labakwamanye amazwe.
Amazwi kaMabuza agcizelelwe nguDr. Vusumuzi Sibanda, isiphathamandla senhlanganiso emela izizalwane zakwamanye amazwe kweleSouth Africa eyeAfrica Diaspora Forum yena othi abokuza bahlezi bephilela evalweni besesaba ukuhlaselwa.
