Ukutshisa kwelanga okwedlulise amalawulo kubikwa sokubulala izilimo lamadlelo kwezinye indawo zelizwe.
Izulu lona selilesikhathi eside lingani njalo abantu abanengi batshona emithunzini ngenxa yokutshisa lokhu.
Ugatsha olubona ngezomkhathi, olweMeteorological Services Department, luthi endaweni ezifana leGwanda leLupane bekukhangelelwe ukuthi kutshise kufike kubo40 Degrees Celsius ngoLwesihlanu.
Isikhulumeli salolugatsha uMnu Tich Zinyemba utshele iStudio 7 ukuthi kuzakuna izulu elilutshwana elilolaka kwezinye indawo zelizwe ngempelaviki.
Kodwa uthe kalisoze liqede isikhudumezi lesi. Izakhamizi zithi zibhekane lendlala emangalisayo njalo ngomnayaka ozayo nanku phela izilimo sezisifa.
“Umumo mubi sibili, kuyatshisa kakhulunjalo izulu lalo alikani. Akulamayezi vele kuyatshisa okokuthi akuhlaleki njalo akulaleki,” kutsho isakhamuzi seLubu, eBinga North uMnu Luke Munenge.
“Umhlaba womile vele izilimo sezitshile konke lotshani. Inkomo ikakhulu zicakile kakhulu njalo ukuze Sithole amadlelo kumele zihambe imango emide engena kubo-7 kilometers.”
Umphathintambo wogatsha olubona ngezemvelo lomkhathi uMnu Nqobizitha Mangaliso Ndlovu, yena ukhuthaze abalokhu belima ukuthi kumele bahlanyele izilimo ezingadingi izulu elinengi ezifana lenyawuthi lamabele.
Ilizwe leZimbabwe liphakathi kwendlala embi lonyaka edalwe yikungani kuhle kwezulu ngomnyaka odluleyo njalo abantu abangu7,7 million badinga ukuphathiswa ngokudla.
Kodwa inani leli libikwa lilakho ukukhuphuka ngomnyaka ozayo nanku izulu kalikho njalo.