Izakhamizi zeNtepe sezikhuthaze uhulumende ukuthi aphe umsakazo weNtepe Community Radio ilayisensi yokusakaza ngokuphangisa zisithi zithwala nzima ukuthola imbiko eqakathekileyo ngenxa yokuthi amagagasi yemisakazo kahulumende engafiki kibo.
Lokhu kuvele lapho inhlanganiso yeZimbabwe Association of Community Radio Stations ZACRAS ithakazelela usuku olwadlulayo olweInternational Day for Universal Access to Information emkhosini oqhutshelwe ezitolo zeNtepe ngoMgqibelo.
INtepe Community Radio Station sileminyaka elitshumi yafaka isicelo sokusakaza kuhulumende kodwa kuze kube lalamuhla ayikayiphiwa ilayisensi.
Lokhu sekudale ukuthi inengi lezakhamizi leqiwe yimbiko eqakathekileyo ngoba amagagasi emsakazo kahulumende engafiki endaweni ezinengi kulesisabelo okudala ukuthi inengi lihlale lisemnyameni ngalokhu okwenzakalayo.
UMnu. Albert Mdlongwa yisakhamuzi seNtepe, uthi sesiside isikhathi belindele umsakazo kazulu.
“Sithethe isikhathi eside iminyaka sicela ukuthi okwamanje akutshintshe kuphangise ukubuya sisakaze lapha eNtepe ngoba sekuleminyaka efika eyisikhombisa lokhu kuthiwa iyabuya sicela ukuthi ibuye lathi into zethu sizidlulise.Amaradio akoBulawayo asiwezwa asiwabambi kuhle amawaves akhona ngaphandle kwaStudio 7 zimbamba kuhle konke okwangale asikubambi, sicela ukuthi kube leyethu la sizilalele eyethu ngoba isikhathi sesiside sesitshove kakhulu sicela ukuthi ayiphangise ibuye,” kutsho uMdlongwa.
Esinye isakhamuzi seNtepe uMnu Collin Sibanda uthi umsakazo kazulu uzanceda kakhulu kuntuthuko yesigaba njalo uzadala ukuthi kube lula ukuhanjiswa kwembiko ephuthumayo kuzakhamizi.
“Nga uhulumende bakithi uyasizwa siwanikwe lawo malayisensi esiwakhalelayo, akulangozi ekhona ukuthi umuntu athole ilayisensi yokusakaza njengabantu siyayicela leyo layisensi yokuthi sisakaze sikhulume ngendaba zethu sithuthukisane sisiya phambili.Kuqakatheke kahulu ukuthi bathole amalayisensi ukuze ezentuthuko lokhu esingathi yidevelopment kusukela khonapha esigabeni kube lula ukuthi kuzwakale,” kutsho uSibanda.
UKhansila kaWard 13 uMnu Phineas Maphosa obekulumbathano uthi laloba sesiside isikhathi belinde ilayisensi yokusakaza akusensuku zatshwala ukuthi bayithole.
“Sivela khatshana ngohambo lolu olweNtepe Community Radio Station, sekudlule iminyaka elitshumi mina lawe sisehlelweni lolu sifuqa ukuthi amagagasi engizwe kukhulunywa lapha ukuthi ayintuthuko yabantu besigaba salapha siwathole okusemthethweni to benefit us lemuli zethu.Sesifikile kuzinga lokuthi siyethola manje ilayisensi , uPresident ugcizelele ukuthi sesipha imisakazo kazulu amalayisensi lokhu kuphume kuMongameli ngokwakhe,” kutsho uMaphosa.
UMqondisi wenhlelo zeNtepe Community Radio Station uMnu Mvelo Zondo uthi okwakathesi lumsakazo usebenzisa indlela ezitshiyeneyo zokuhambisa imbiko ezibalisa iWhatsApp ukufinyelela kuzulu besalinde imvumo yokusakaza kuhulumende.
“Uhulumende kukhanya uhudula inyawo ukuthi asinike lawo magagasi ukuthi sisakaze , okwamanje siyasakaza ngawhatsapp lama bulk sms lokufaka nje emaphepheni amaflyers esiyabe siwathumezela ebantwini njalo okunye esikwenzayo ngama community meetings , uma singathola ilayisensi abantu besigaba bazathola information ngesikhathi abafuna ngaso,” kutsho uZondo.
Inhlanganiso yomanyano wamazwe eyeUnited Nations ithi kubalulekile ukuthi uhulumende emazweni yonke jikelele athuthukise imitshina yokuhambisa imbiko emaphandleni ukuze izakhamizi lazo zenelise ukuthola imbiko kanye lolwazi kalula.
Uhulumende wakuleli usanda kuvuselele uhlangothi olweBroadcasting Authority of Zimbabwe BAZ ngemva kokukhethwa kwamalunga amatsha azalawula umsebenzi wokunikezwa kwabantu amalayisensi yokusakaza.
Kusenjalo abogatsha lokondliwa kwezifuyo abeAgritex bathi liya liqonga nsukuzonke inani lenkomo ezibulawa yindlala njalo sezedlula inkulungwane eziyisitshiyangalombili 8028 inkomo esezifile inengi lazo eBeit Bridge lase Insiza.