Umthethwandaba oxazulula ingxabano phakathi kwezisebenzi labaqhatshi oweLabour Court uzathetha udaba lokukhalala umsebenzi kwabodokotela namuhla.
Uhulumende umangalele odokotela laba kulandela ukwala kwabo ukubuyela emsebenzini izolo besithi kumele aqale akhweze iholo labo ngesilinganiso abasifunayo.
Lokhu kubangele ukuthi uhulumende acele umthethwandaba weLabour Court ukuthi unqume ukubana ukukhalala umsebenzi lokhu akukho emthethweni.
Khepha odokotela bona bathi abakhalalanga umsebenzi kodwa bayehluleka ukuya emsebenzini ngoba kabalamali yokugada.
Ingcwethi kwezemithetho yezisebenzi uMnu Davies Ndumiso Sibanda utshele iStudio 7 ukuthi odokotela bengaqina ngesizatho sokuswela imali yokugada, balakho ukunqoba emthethwandaba.
Ukukhalala umsebenzi kwabodokotela ezibhedlela zikahulumende lokhu sokufake izigulane esimeni esibi kakhulu ngoba zingakutholi ukwelatshwa.
Kodwa koBulawayo, ikhansili yalelidolobho ithi amakiliniki ayo angamatshumi amabili ayabelapha abantu abehluleka ukuthola usizo esibhedlela seMpilo leseUnited Bulawayo Hospitals.
Umgcinisihlalo wekhomithi ebona ngezempilakahle kulikhansili, ukhansila Lilian Mlilo utshele lumsakazo ukuthi banengi abantu abathola usizo kubodokotela bakamasipala.