Uzulu wakoBulawayo uthi ukugcinwa kwesidumbu sikaMnu Robert Mugabe okwenyanga engakangcwatshwa yikudlaliswa imali kahulumende evele ingekho.
Uhulumende nguye obhadala indleko zomngcwabo kaMugabe, okugoqela ukugcinwa kwesidumbu sakhe okwesikhathi sonke lesi kusakhiwa ithuna lakhe.
“UMugabe usihluphe 39 years ephila, egula, afe elokhe sihlupha,” kutsho osakhulayo wakoBulawayo uMnu Ndodana Moyo.
“Asilani lokuncwatsha kukaMugabe, akusiyo-priority yethu, ipriority yethu ngamagesti, yimisebenzi, yimithi ezibhedlela. Ukuthi alungiselwe indawo e-special asikusekeli.”
Esinye njalo isakhamuzi sakoBulawayo uNkosikazi Kwanele Nyathi uthi akavumelani lendlela uhulumende aphathe ngayo isililo sikaMugabe.
“Angilawo nje amanengi ngokufa kwalubaba; usitshiyele ubunzima lamanje siyahlupheka labantwabethu bayahlupheka. Asazi ukuthi abazukulu bethu sizabatshiyelani,” kutsho uMnu Nyathi.
Amazwi kaNyathi agcizelelwe ngunobhala jikelele weqembu elilwela amalungelo oluntu eleIbhetshu likazulu uMnu Mbuso Fuzwayo.
“Okudanisayo yikuthi bamuphe ikhefu ngemva kokubulala abantu. Labo abantu ababulalayo bathini ngakho njalo bezwa njani,” kutsho uMnu Fuzwayo.
Kodwa ilunga lebandla leZanu PF uMnu Blessed Chidanire uthi akulalutho olubi ngokuthi uMugabe abekwe ngemva kwenyanga.
“Ngizwa ubuhlungu ngokufa kukaMugabe, silahlekelwe njengesizwe. Angilawo amanengi kodwa abadala bemuli yakhe yibo abangatsho ukuthi engangcwatshwa njani,” kutsho uMnu Chidanhire.
