Inkomo eZansi yemaNdebeleni seziqalile ukucuba ngenxa yendlala njalo ezinye ziyabhaja edakeni zife zidinga ukunatha amanzi emadamu asomile, osekubangele ugatsha lwe Agritex luthi lwesabela ukuthi kuzakufa inkomo ezifika inkulungwane ezingamakhulu amabili lonyaka.
Ukusilela kwamadlelo kanye lokuswelakala kwamanzi eZansi yemaNdebeleni ngenxa yokungani kuhle kwezulu nyakenye sekudale ukuthi inkomo ziqale ukucuba endaweni ezitshiyeneyo.
Isimo sesisibi kakhulu endaweni ezibalisa eGwanda South, eBulilimamangwe , eMatobo kanye lase Beit bridge lapho okubikwa sekufe inkomo ezifika phose amatshumi amahlanu.
NgoLwesithathu kuliviki umsakazo weStudio 7 uvakatshele koMaphani phansi kwedolobho leGwanda lapho athole kubhaje inkomo ezinhlanu edamu kuthi ezinye besezifile.
UMnu. Mandlenkosi Ngwenya yisakhamuzi sakoMaphani. Simthole senyula inkomo yakhe ebibanjelwe. Uthi kuyadingeka ukuthi kukhitshwe inhlabathi kulelidamu ukuze inkomo zingabanjelwa
“Into esingayikhalela ngaya siyancediswa nguhulumende ngamanzi,yikho ubona idamu lethu alila ngitsho amanzi nga liyakutshwa nga siyaphiwa lezibhorane kumbe amapump sithole amanzi lathi ukuthi inkomo zethu zinathe yikho okusilelayo esigabeni sethu lesi,” kutsho uNgwenya.
UMnu. Julius Nare yisakhamuzi seTshindeni, uthi njengabalimi bayalahlekelwa kakhulu yinotho yabo ngoba bephila ngalezinkomo ikakhulu ngalesisikhathi sendlala.
Kutsho uNare: “Ngikhuluma ngendaba yamanzi ukuthi ngabe bayazama ukusikupela idamu leli, inkomo sezibanjwe kakhulu ezinye sezafa khonapha edamu yizo esiphila ngazo vele sidle ngazo asisebenzi yizo ezisincedayo konke lokulima lezinkomo so nxa sezisifa so lendlala sinkulu amanzi ayasilela elinye idamu likhatshana ngama 12km e4 manje lapha lonyaka yindlala.”
Ngaphandle kokutsha kwamadamu ezikotsho lakho amanzi segobhoza kancane osekudale ukuthi izakhamizi zivuke emadabukakusa zisiyadinga amanzi.
UMnu Bartlas Nkala yisakhamuzi seSilikwe phansi kweNduna uMasuku eGwanda North, uthi isimo sibi kakhulu lonyaka.
“Sesilohlupho olwesabekayo lwamanzi, umfula uSilikwe loSilikwana ngapha eMatshetsheni bavala amadamu ngo1992 ayizange iphinde ivulelwe amanzi manje kathesi amanzi akusela laba ababona ngokuvula amadamu amakhulu bake basivulele ukuze senelise ukunathisela izinkomo mgikhuluma nje lamhlanje besikhelelela izinkomo ake aphela du sama salindela ukuthi kugobhoze lezinqola ziyabe zilayinile zidlula ama 16 kunzima okumangalisayo ake lizilamulele bakithi,” kutsho uNkala.
ENtalale phansi kweNduna uMathe eGwanda South lakho bakhala ezimathonsi ngodubo lwamanzi.
UMnu Brighton Nare uthi abakaze bakubone okwalonyaka.
“Isimo samanzi lonyaka sisibeke kwelinye izinga elesabekayo okokuthi lonyaka kuzakubanzima nxa izulu lingaphangisanga sesiphongukhuleka ukuthi nga uNkulunkulu uyasibona izulu liphangise ukuna ngoba nxa lingaphangisanga ukuna sekukubi vele ngoba into ekhona since amadamu akhona agejwa nguSmith lalamhlanje amdamu khona kasatshoni njalo sethatha isikhatshana abesesitsha,” kutsho uNkala.
UMnu. Hatityi Muchemwa ingcwethi kwezokufuywa kwenkomo eZansi yemaNdebeleni kugatsha lweAgritex uthi inkomo ezifika phose inkulungwane ezingamakhulu amabili 200 000 zisengozini yokufa lonyaka ngenxa yendlala lokusilela kwamanzi.
Ukhuthaza uzulu ukuthi athengise ezinye inkomo ukuze athenge ukudla kwazo.
Isabelo seZansi yemaNdebeleni yiso esithenjiweyo ngenkomo kuleli njalo okwamanje ezikhona zifika phose inkulungwane ezingamakhulu ayisithupha 600 000.
