IZimbabwe Anti-Corruption Commission (ZACC) ithi uzulu kumele amangale kuyo lasemapholiseni amacala enkohlakalo ngoba kungumlandu womuntu wonke ukulwisana lokungethembeki elizweni.
Ikhomishini le ithi njalo kulomthetho obunjwayo okwamanje ozavikela abaza phambili lobufakazi.
“Kulokungahambi kuhle kwezimali kwezokwenjiwa kwamatshe aligugu kanye lenkohlakalo ephindwe kabili, okubisela muva intuthuko elizweni,” kutsho isiphathamandla seZACC uMnu Onesimus Nyaude emhlanganweni abawenzele eGwanda lezakhamizi ngoLwesihlanu.
“Njenge Zimbabwe Anti-Corruption sikhuthaza uzulu ukuthi engavumi njalo engalingwa yinkonhlakalo kodwa abike lapho isenzakala.”
Isikhulumeli samapholisa ezansi yeMaNdebeleni uChief Inspector Philisani Ndebele utshele umhlangano munye ukuthi abantu abanengi kababiki amacala aphathelane lenkohlakalo ngoba kukhona labo abakuzuzayo.
“Silama-neighbourhood watch, silama-suggestion box ukuthi nxa ungafuni ukwaziwa ukuthi ngubani okhiphe i-information yokuthi kulama-corrupt activities ayenzakala endaweni enje but ule-information egcweleyo ukuthi kulento engabambeka, so mina ngithi umlandu ukimi lawe to say no to corruption.”
