UMayor wakoBulawayo, uMnu Solomon Mguni uthi sebemelele impumela yequla likahulumende eliphenya udaba lokuxotshwa umsebenzi kukamabhalane wekhansili yaleli dolobho, uMnu Christopher Dube.
Umphathintambo wogatsha lwembuso yezabelo, uMnu July Moyo uthumele iqula leli ngeviki edluleyo ngemva kwengxabangxoza eqhamuke phezu kokuxotshwa kukaDube ngumsekeli kaMayor, uMnu Tinashe Kambarami.
“Baqgibe umsebenzi wabo ngoMvulo ekuseni; sebebuyelile eHarare njalo bathi sebesiyalungisa ireport leyo abazayinikeza uMinister ukuthi kuyini abakutholileyo. Bathembise ukuthi ngoLwesihlanu kuliviki bayabe sebeqedile ukuloba ireport besebeyinikeza uMinister kuviki elandelayo,” kutsho uMnu Mguni.
Kusenjalo, uMguni uhlangane labedale lasebeleminyaka bekukhansili eleEderman's Forum bebuzisisa ngokwenzakalayo lokuthi iqula labacubunguli lisebenze njani.
“Ubuyile wazohlangana lathi uMayor wasethulela konke okwenzakalayo wathi lindaba isesemaCourt, lakuLocal Government lokuthi bekulabantu abakade bezocubungula okwenzakale koBulawayo,” kutsho umgcinisihlalo weElderman's Forum uElderman Phineas Ndlovu.
UNdlovu uthe njengabadala bedolobho sebelinde impumela yophenyo lolu.
“Ngemva kwalokho sesizimisele ukuba sizwe ukuba kuphumani emthethwandaba lakuphenyo olwenziwe liqula elisuke kugatsha lweLocal Governement,” uqhubeke etsho uNdlovu.
O-Elderman Phineas Ndlovu, David Ndlovu, Bathandi Mpofu, Ephraim Ncube, Amen Mpofu, Lot Siziba, Norman Hlabano, Elmon Mpofu, Denis Ndlovu, Abednico Nyathi, Matson Hlalo, Gideon Mangena, Collet Ndlovu loRafa Moyo yibo abangene umhlangano lo loMayor.
Batshele uMguni ukuthi ukuxokozela okwenzakala koBulawayo abakuthakazeleli. Ngakho, bathe bayaxolisa kuzakhamizi zaleli dolobho lelizwe lonke jikelele.
Phakathi kwamaviki amabili edluleyo kube kuphoselana amazwi amabi phakathi kukamsekeli kaMayor, uKambarami, lomabhalane wekhansili uDube ngemva kokuba uKambarami exotshe uDube umsebenzi ezini wenza imisebenzi yenkohlakalo kanti njalo akawuphathi kuhle umsebenzi wakhe.
Kucine kungenela izakhamizi zatshengisela kwaba lokuxokozela kanye lokufuthelana okubangele ukuthi uhulumende athumele iqula lokuzophenya loludaba.
