Izakhamizi zemaphandleni eMatabeleland South zithi zikhala ndawonye lozulu weManicaland owelwe yingozi yesiphepho esibulale amakhulu abantu sakhukhula lemizi inkulungwane zasala zingelandawo zokuhlala.
Ngokutsho kukahulumende, uCyclone Idai ubulale abantu abafika kumakhulu amabili lamatshumi edlula kancane amahlanu, 259.
Kodwa inani leli likhangelelwe ukuqonga ngoba bebanengi abalokhe bengaziwa ukuthi bangaphi kanti abanye ngabafayo abalokhe begqitshelwe litshebetshebe abangakatholakali.
UNkosikazi Julieth Nkiwane, ongumgcinisihlalo wenhlanganiso yeWomen Development Association of Zimbabwe, uthi indlela uhulumende aphathe ngayo lingozi iveza sobala ukuthi ubengazilungiselelanga lanxa ebekwazi ukuthi kulezulu likazamcolo elizayo.
Lanxa abanengi eMatabeleland bebekhalela ukuthi izulu line, sebetshaywa luvalo nxa bebona amayezi esibhakabhakeni.
UMnu. Edgar Ncube yisakhamuzi eSimbuka phansi kweNduna uMathe lapho okulezili elike ladiliza izakhiwo kunyanga ezimbili ezedluleyo.
UNcube usole kakulu uhulumende esithi kaazange athathe amanyathelo okususa abantu beManicaland endaweni zabo izulu lingakani lanxa ebekwazi ukuthi liyeza lomonakalo omkhulu.
