Amalunga ekhomidi yedale lephalamende ebona ngentuthuko yezabelo ngoLwesibili akhuthaze umasipala weGwanda ukuthi asebenzelane lezakhamizi ukuze kulungisiswe udubo lokusilela kwamanzi kuWard 5 eSpitzkop North.
Amalunga alikhomidi aye kulelidolobho ngemva kwesikhalazo esakwezwa ephalamende yizakhamizi zikhonona ngokuswelakala kwamanzi, impompi ezihambisa ingcekeza kanye lemigwaqo kuleli lokitshi.
“Bekungela kukhulumisana kuhle phakathi kwezakhamizi lamakhansila ukuthi babone iway forward. Sifike lapha sakhuluma labo sababambanisa ukuthi badinge indlela yokuthi kube le-service delivery,” kutsho ilunga lalikhomidi uMnu Mthokozisi Monaki Mpofu, olilunga njalo lebandla leZanu PF.
“Sithemba ngenkulumo esizenze lamhlanje bazasala bebambene bemunye beqhubeka nge-development ukuthi isigaba lesi sithole amanzi ngoba amanzi yimpilo ebantwini, water is life”
Sekuleminyaka elitshumi uzulu ephiwa indawo zokwakha eSpitzkop North kodwa inengi lilokhu libhekane lodubo lokusilela kwamanzi okudala ukuthi inengi liyezinceda emahlathini.
“Ama-stands esikhuluma ngawo sawaphiwa ngo2009, it’s almost 10 years now, ama-stands lawo kawaseviswanga, awala migwaqo, awala matoilets sewer pipes akulamanzi,” kutsho isakhamusi seSpitzkop uNkosazana Duduzile Masilela.
“Kuqala bekusesengcono ngoba abantu bebengakayakhi ngobunengi kuleganga ukuthi abantu bangayela, akusela ganga lokuthi abantu bazahamba khona.”
