Izakahamizi emaphandleni zithi lonyaka bezithwele amagabha avuzayo kulandela ukubhidlika komnotho njalo zikhuthaza uhulumende ukuthi adonse amabhulugwe akhe ukuze ziphile impilo engcono.
Inengi lezakhamizi lithi umnyaka ka2018 ubunzima kakhulu lapho kuqathaniswa leminyaka eyedlulileyo.Zithi lokhu kudalwe yikuma manzonzo kwezomnotho osekudale ukuqonga kwentengo yempahla ezitolo kanye lokusilela kwezinye.
Lonyaka inengi lidlale ikhisimusi lingelamafutha ezimota, isinkwa, amanamnede kanye lotshwala.
Isakhamuzi seNtalale phansi kweNduna uMathe uMnu. Brighton Nare uthi udubo ababhekane lalo okwamanje lwaqala ngemva kokhetho oluqhutshwe ngoNtulikazi.
Kutsho uNare: “Mina into engizwisisa ubuhlungu yikuthi into le ibi obvious kuyiwa kuma elections ukuthi kungawina iZanu vele kuzawoma so lonyaka but abantu bakhetha bona ukuthi babisele iZanu basibisele edubeni olufana lalolu futhi ngikunanzelele ukuthi asila macourt lapha eZimbabwe asilamapholisa thina asimelayo thina abantu konke ngokweZanu kuZanularised konke.”
UMnu. Special Dube oweNyandeni uthi ukungani kuhle kwezulu sekulethe ubunzima obuphindwe kabili kuzakhamizi ngoba sezibhekane lendlala embi.
“Umnyaka lo ngokuwubona kwami ubenzima kakhulu phose okwedlula eminye iminyaka, ngoba eminye iminyaka iyake ibenzima kodwa izulu libekhona sikwanise ukuthi sizame ukulima manje lo uwomile, sike salima kuyatsha lemfula inkomo lokhu sisidingela amanzi sizigebhela hayi lo ngiwubona unzima kakhulu,” kutsho uDube.
Esinye isakhamuzi uNkosikazi Millie Mpofu uthi lonyaka umangoye ebelala eziko njalo ufisa ukuthi umnyaka ozayo ubengcono kulalo.
“Umnyaka lo ngalesisikhathi esikiyo sibuhlungu kakhulu empilweni zethu sifisa kubelenguquko kumnyaka ozayo kutshintshe ngoba lesisimo esikisiso sibuhlungu kakhulu lezulu alikho siphakathi kwendlala labantwana lokuthi sibapheni izinto azithengeki lokuthi sibaphene kuyasi nzimela lokhu,” kutsho uMpofu.
UMnu Dennis Moyo uthi lonyaka bebekhangelele ukuthi bazaphila impilo engcono kulandela ukhetho kodwa lokhu bethwele nzima lalamhlanje.
“Izinto zisuke zoma kakhulu zisuke zoma besikhangelele ukuthi izinto zingatshintsha kubengcono kodwa ngendlela osekuyiyo wona kathesi unzima u2018 akulanto ecacayo elungele abantu.Ezikolo kubenzima ezitolo akulanto ekhona, into ejabulisa abadala butshwala baswela bona utshwala ezitolo abukho,” kutsho uMoyo.
UNkosazana Media Sithole oweSitezi uthi kuyadingeka ukuthi uhulumende athuthukise ezomnotho ukuze benelise ukuthola imali emabhanga.
“Umnyaka ka2018 unzima kakhulu ngoba into kazithengeki besifisa ukubana uhulumende angasilungiselela ukuthi izimali emabank sizithole abantwana siyenelise ukubadingela amawunifomu ngoba kathesi nxa ulomntwana oya kufomu 1 njengami so ukuthi ngiqalise ukuthi iwunifomu lezicathulo ukuthi ngizakususa njani, imali iyabe ikhona engxenye ekhadini ngilayo kodwa eshop umuntu uzafuna icash angilayo,” kutsho uSithole.
Inengi emaphandleni lonyaka beliphila ngomumbu okuphiwa osuka kuhulumende njalo uNkosazana Enelisi Ncube uthi kuyadingeka ukuthi bathole impompi zamanzi ukuze balimi ngokuthelezela ikakhulu ngalesi sikhathi izulu lingekho.
Kunzima sibili kulelanga elikhulu kakhulu, kulendlala, size sincedwe yibonalabo abamaWelfare sithanda ukuthi ngani siyazuza kumbe bangasincedisa ngokuthi sizenzele basinikeze okokuthi sithelele izingadi sikhuluma nje sithelela ngamakhanda besifisa ukuncediswa ukuze ingadi ziyande abantu bathole ukuphila,” kutsho uSithole.
Loba nje inengi lilethemba lokuthi umnyaka ozayo uzakubangcono inengi labazali selikhala ngokuqonga kwembhadalo yezikolo amaSchool fees yona aseqonge okumangalisayo kuthi ezinye izikolo sezifuna imbhadalo ngedola leMelika.
Intengo yezigqoko zesikolo amaUniform layo ikhuphukile okumangalisayo osekutshiye inengi labazali lingelamathe.
Kungenani lobunzima obubhekane lozulu uhulumende kaMongameli Emmerson Mnangagwa uphethe esithi uzulu kabekezele esalungisisa.
