Izakhamizi zemaphandleni eZansi yeMaNdebeleni zithi beziswela ukudla lonyaka ngakho-ke uhulumende kumele athuthukise ezomnotho ukuze ziphile impilo engcono kumnyaka ozayo.
Inengi lezakhamizi lithi belithwele amagabha avuzayo lonyaka ngenxa yesimo esibi somnotho. Zithi sekungumlandu kahulumende ukuthi athuthukise impilo kazulu wemaphandleni kumnyaka ozayo.
Inengi lithi libhekane lendlala embi kakhulu njalo ukuqonga kwentengo yempahla ezitolo kubatshiye behlaselwa yindlala.
UNkosikazi Agnes Mbangeni, oweSitezi phansi kweNduna uMathema, uthi lonyaka kube yintando yeNkosi ukuthi bengabulawa yindlala. Ukhuthaza uhulumemde ukuthi akhangele ngenhlalakahle yabadala emakhaya.
Kutsho uMbangeni: “Bekungamnandi, bekumnandi kasifanga kodwa bekungamnandi lanxa ngithengisa okuyinkukhu uthi uyangifakela kuEcocash, nxa ngifika kuEcocash bathi dobha itshukela kambe lakusasa ngidobhe eyinye inkukhu ngithenge itshukela? Akubani bekunguhulumende okwazi ukuthi ilizwe leZimbabwe lilabantu abalupheleyo abengenelisi ukwenzulutho ebefanele ukuthi asikhumbule asinike imali eqondene lathi. Uhulumende sicela ukuthi asazi yena ngokwakhe.”
Amazwi akhe agcizelelwe nguNkosikazi Enelisi Ncube, oweSibhula, othi inengi lezakhamizi alisebenzi njalo liphila ngokudla kokuphiwa okusuka kuhulumende.
“Thina eSibhula kunzima sibili, kulelanga elikhulu kakhulu kulendlala size sincedwe yibonaba abama welfare yibo abaphosela mbhijana okungotsotsi ukubana ngomuzi kungene utsotsi yikho abantu babesebesizakala njalo silima zona izingadi ukuthi sibi sesizuza phela okokutshebisa utsotsi oyabe lo oyabe umphiwe , yikho akulalutho esiphila ngalo akusetshenzwa luyabe luyihluphe lodwa phakathi kweguma,” kutsho uNcube.
UNkosazana Media Sithole uthi ukusilela kwamafutha ezimota sekudale ukuthi beyehluleke lokufinyelela amadolobho amakhulu lapho akade bethola khona impahla ezilentengo ephansi.
Kutsho uSithole: “Umnyaka ka2018 unzima kakhulu ngoba into kazithengeki ungaze uthi uya eGwanda, futhi iGwanda ibingcono kwesinye isikhathi ungagada izimota ifika ibingcono.Kathesi ungaya eGwanda izimota zokuphenduka awuzitholi ziyabe zilayinele ipetrol suswela ukuthi uphenduke ekhaya.besicela ukuthi uhulumende angasilungisela ukuthi imali emabank sizithole, imali iyabe ikhona kwesinye isikhathi ekhadini kodwa eshop umuntu uzafuna icash.”
UKuswelakala kwemisebenzi lokhu sekudale ukuthi abatsha emaphandleni abafana loAaaliyah Sibanda bethenge impahla bethengisa. Kodwa laye ukhala ngokuthi kunzima ngoba labo abathengiselayo bayabe bengelamali.
“Thina esiziphilisa ngakho njengabatsha yikuthi siwode izinto zonezo ezithengisekayo ukuze sithole imali but kunzima ngoba imali yakhona siyithola nzima ngesimi sonalesi esikhona esikhangelane laso.Thina esingakhalaza ngakho kakhulu yimisebenzi ukuthi sikwanise ukuzincedisa lokuthi sibe lamaprojects atshiye tshiyeneyo okufuya inkukhu noma siloan inkomo izinto ezingakwanisa ukuthi zisincedise empilweni,” kutsho uSibanda.
Loba nje ilanga leKhisimusi selisondela inengi emaphandleni lithi akulamalungiselelo alelikhefu ngenxa yokubhidlika komnotho wakuleli osekudale ukuqonga kwentengo yempahla ezitolo.
UNkosazana Relation Moyo uthi ilanga leKhisimusi lonyaka lizadlula njengawowonke amalanga.
“Ikhisimusi yethu yalonyaka ayithembisi ukuthi izakuba yikhisimusi ejayelekileyo njengeminyaka edlulileyo ngoba nxa sikhangengela intengo yempahla iphezulu kakhulu okuthi ikhisimusi yakhona izaba ngeyokudlulisa kuphela ilanga lekhisimusi kungasikho ukuthi kungaba lani okuhle ngayo,” kutsho uMoyo.
Inengi lezitolo, ikakhulu emadolobheni, selithengisa impahla ngamadola eMelika okudala ukuthi uzulu wemaphandleni ongafinyeleli imali yaphetshaya athwale amagabha avuzayo.
Loba nje uhulumende ephethe esithi amandla ebond lawedola leMelika ayalingana, kusobala ukuthi usenga ezimithiyo ngoba inengi lezitolo lingasayamukeli amabond notes.
