Omunye weziphathamandla zohlangothi lukahulumende lwezemfundo eGwanda setholakale efile kuthi omunye lokhu engabonakali kulandela ukuthathwa ngumfula kwemota yabo ngoMvulo ebusuku ngemva kokuna kwezulu elinengi.
Umzimba kaNkosazana Samukeliso Dlamini obenguDistrict Education Inspector utholwe zingcitshi zokubhukutsha ezikuhlangothi olulondoloza ukuthula eZimbabwe edamu leMenebulamba izolo ntambama okungaba ngamakhilomitha amahlanu kusukela ebholohweni abathethwe khona ngumfula uMamsisi.
Obehamba loMaDlamini obona ngokusetshenziswa kwezimali kuhlangothi lwezemfundo, uMnu. Richard Nyandoro, kakabonakali njalo amapholisa azaqhubekela phambili emdinga namuhla.
Kutholakale ibhulugwe lakhe ebelilesikhwama sakhe semali kanye lezithupha.
Isikhwama semali sikaMaDlamini okubikwa besilemali engaba zinkulungwane ezintathu zamadola sikhuthuziwe kwatholakala kuphela izithupha lezinye nje incwadi zakhe.
UMnu. Moses Sibanda, isakhamuzi seNtalale, uveze ukudana ngalingozi.
Kutsho uSibanda: “Ingozi le iyenzakale kuMamsisi, a small stream othela kuPelele River ngezulu lakuthange around half 7 kusiya kuma 8.”
Izakhamizi zithi lingozi ibingavikeleka nga amabholoho akulindawo alungiswe ngokuqondileyo. UMnu. Brighton Nare ngomunye wabalo mbono lo.
“Amaboloho akhona kayakhekanga, ibridge esngathi lingcono nguPelele kodwa last time laphosa lathatha ibus , into ingiyinanzelelayo yikuthi thina ngapha ingathi asikho eZimbabwe ingani sikwelinye ilizwe ngoba ngendlela okwenzakala ngakhona amabholoho ethu they are poorly made,amanye vele since atshiywa nguSmith so vele imigwaqo yakithi amabholoho akhona apoor vele asinanzwa,” kutsho uNare.
Esinye isakhamuzi seNtalale, uNkosazana Carolyn Dube, uthi badabukile ngalingozi. Ugcizelele esithi kuyadingeka ukuthi uhulumende alungise amabholoho afana lala.
“Into le eyenzakale eNtalale kuWard 11 isizwisa ubuhlungu ngokulahlekelwa okukhulu besesicela kuhulumende uncedo lokuthi asincedise ikakhulu ebrijini asilungisele umgwaqo ngoba ibridge lakhona liphansi njalo ngumfula omncane ongakhangelelwanga ungenza ingozi kodwa sudale ingozi ebuhlungu,” kutsho uDube.
UKhansila weNtalale, uMnu Coaster Ndlovu, uthi bathintekile ngalingozi njengezakhamizi zeNtalale ngoba belahlekelwe kakhulu ezikolo.
“Sisebenze labo ezikolo kuhle kakhulu. I remember one time last year but one ,we sought advice from kubobonke both of them,ngabantu abasiphathisa kakhulu ngendlela elokuzwisisa awusali uthandabuza nxa kade bethe basicebisa,” kutsho uNdlovu.
Imbongi uQindi Lerato Ndlovu, oyisakhamuzi zeNtalale njalo esebenzelana labeTraffic Safety Council, ukhuthaze abatshayeli bezimota ukuthi batshayele ngonanzelelo ikakhulu ngalesisikhathi sekhefu leKhisimusi.
“Ngiyake ngikhulume kakhulu ukuthi abantu bengagijimi kakhulu, bengajahi, isikhathi sezulu kakhulu nxa kubayima kumbe kuphazima lamalight kalight kahle amanzi, kuyabe kuphansi ilight liyeqe liyengale so kumele lapho okulezifula basilow down bahambe kahle,” kutsho Ndlovu.
Unobhala wogatsha lwezemfundo, uNkosikazi Tumisang Thabela, ngomunye weziphathamandla zikahulumende ebezikhona eNtalale.
