Imbhadalo yemitshova ikhwelile emadolobheni atshiyeneyo ngoMvulo isuka ku$0.50c yaya ku$0.75c uhambo olulodwa.
Abemitshova bathi benze lokhu ngoba labo bedulelwa ngamafutha ephethulo ledizili wona abawathenga emkambo wensitha.
Indwendwe zezimota ezitshona zimelele amafutha emagalajini seziyinsakavukela umchilo wesidwaba elizweni lonke jikelele.
Isakhamuzi sedolobho lakoBulawayo uNkosazana Amanda Moyo uthi okudanisayo kakhulu ngokukhwela kwembhadalo yemitshova yikuthi iholo lezisebenzi lihlala limi ndawonye.
“Ikhwelelani imitshova ifuel ingakhwelanga? I-govenment kumele ingenele ngoba imiholo yona kayikhwelanga,” kutsho uNkosazana Moyo.
Othengisa amafutha ezimota ngudlu uMnu Dumisani Mpofu utshele iStudio 7 ukuthi ukusilela kwephethulo lezidili lokhu sokubangele ukuqhamuka kwenkohlakalo phakathi kwabenza umsebenzi wakhe labamagalaji.
“I-fuel igcwele emagarajini la. Ingafika bayasifonela bengavele bayidilive bayasifonela basibize sithengise,” kutsho uMnu Mpofu.
Ukukhwela kwembhadalo yomtshova lokhu kuza ngesikhathi intengo yezinto ezinengi ikhuphuka mahlayana mihla lamalanga ezitolo.
Esinye njalo isakhamuzi sakoBulawayo uMnu Nkosini Bhebhe uthi ilizwe lilakho ukubuyena esimeni esibi esaba kilo ngo2008 lapho okwakungasatholakali lutho ezitolo.
Okwakutholakala kwakudula okumangalisayo.
“Into ezenzakala emaShop vele asizithandi. Ama-pay kawakhwelanga kodwa izinto zikhwelile. Isimo siba worse ngoba izinto zikhona kodwa asizitholi,” kutsho uMnu Bhebhe.
