Abesifazana beGwanda sebekhuthaze amakhansila asanda kukhethwa ukuthi alungisise udubo lokuswelakala kwamanzi kulelidolobho.
Inkuthazo le iphume emhlanganweni wabomama lamakhansila obuqoqwe yinhlanganiso yeWomen In Leadership Development (WILD) ngoLwesithathu.
Abesifazana abangene lumhlangano bavumelene ukuthi udubo olumqoka okumele luqale ukukhangelwa ngamakhansila ludubo lokuswelakala kwamanzi kulelidolobho.
Loba nje itanka elikhulu elikhangelelelwe ukuqeda loludubo seliphelile ukwakhiwa, impompi ezidonsa amanzi kazikafakwa.
“Itanka nansiyana imile, elingenileyo sicela liqedise itanka amanzi aphume ayafuneka,” kutsho isakhamuzi uNkosazana Duduzile Masilela.
“Sicela ukuthi ibooster time and again ihlale ilefuel amanzi atholakale. Kathesi silamalanga amane wonke singelamanzi eSpitzkop North; siyawacela bakithi.”
Amazwi kaMasilela agcizelelwe ngesinye njalo isakhamuzi uNkosazana Nomsa Vela yena othe kuyadingakala ukuthi ikhansili yeGwanda iqakathekise ukuhlanzeka ngokuthwala izibi ukuze kuvikelwe imikhuhlane efana lowecholera wona osubulele abantu abangamatshumi amabili lambili eHarare.
“Izibi sinanzelela ukuthi uWard 4 sekungathi yidump site idothi yonke itholakala kuWard 4 nxa sihamba asila sithunzi sibonakala nje ngabantu bedothini,” kuchasise uNkosazana Vela.
Umqoqi wenhlelo zeWILD UNkosazana Thubelihle Mafu uthe bazaqhubeka behlanganisa abesifazane lamakhansila ukuze indubo zabo zilungisiswe.
UMafu ukhuthaze omama ukuthi labo baphatheke kwezombusazwe.
“Lathi siyathaba ukuthi lamhlanje kulokhansila ongumama phakathi kwenu. I hope in the next 5 years omama bayabe sebebanengi kumansipala,” uqhubeke etsho uMafu.
UMayor weGwanda uMnu Jastone Mazhale, yena ongene lumhlangano lamakhansila akhe wonke uthe bazakhangela zonke indubo abazethulelwe yizakhamizi bazame ukuzilungisisa.
