Intathelizindaba sezikhuthazwe ukuthi ziqine ngeqiniso kundaba zokhetho njalo zibhale indaba eziqotho zingela kwesaba ukuze zingazidaleli inhlupho zokuxabana lalabo eziyabe zibhale ngabo.
Inkuthazo le yethulwe yintatheli elodumo uMnu Chris Chinaka ekhuluma labosowabo emhlangweni oqoqwe yinhlanganiso yeMISA-Zimbabwe eGwanda ngoMgqibelo.
Uthe njalo intatheizindaba akumelanga zivume ukufumbathiswa ngabezobusazwe ngoba lokhu kulakho ukubangela ukuthi zingasabhali iqiniso.
Intathelizindaba ebezikulumhlangano zamkele limfundiso ngezandla zombili zisithi ibuye ngesikhathi esiqondileyo.
“Bekuluhlelo oluhle kakhulu ngoba luyasifundisa njengabo nozindaba ukuthi siziphathe njani ikakhulu ma sikhangele indaba zokhetho,” kutsho intathelizindaba ezimeleyo uMnu Alifheli Mudau.
“Engikubambileyo kakhulu kulezizifundo yikuthi onozindaba babhale njani indaba zabo ukuthi bengaxegi abamabandla kumbe bengaxegi abantu abahlala ndawonye kodwa babekwazi ukuthi babhala iqiniso.”
Omunye obesemhlanganweni munye nguNkosazana Sinqobile Moyo obhalela iphephandaba leIlanga.
“Sonke isikhathi esiyabe sihamba khona kuyamele sibone ukuthi siyavikelana siyananzelela indawo esikuyo, nxa sibona ukuthi kukhona okungaba yingozi kithi kumele sibone ukuthi siyazivikela,” kutsho uMaMoyo.
Eminyakeni eyedluleyo intathelizindaba bezihlukuluzwa nagamapholisa kumbe abasekeli beZanu PF ikakhulu ngesikhathi sokhetho.
Iziphathamandla zeMISA-Zimbabwe zikhuthaza intathelizindaba ukuthi zingakhohlwa ukubhala ngamabandla ezombusazwe asacathulayo ukuze uzulu akhethe elolwazi olweneleyo ngawo wonke.
