Omama abazithweleyo esiqintini seMzingwane bakhala ngokuhamba imango emide kakhulu besiyadinga usizo emakilinika lasezibhedlela.
Inengi labomama laba lezinye nje izakhamizi ezigulayo zihamba amakhilomitha edlula amahlanu ukuze ziyefinyelele emakilinika lezibhedlela eziseduzane.
“Kwesinye isikhathi uyathi noma ugula kutholakale ukuthi ekilinika akulamaphilisi ayeneleyo kuthwe yana eMtshabezi, eMtshabezi uyabe usufuna itransport ufike eMtshabezi kuthwe yana eGwanda. Ukuze uyefika eGwanda kuyabe sekuzimali,” kutsho isakhamusi uNkosazana Sipho Ncube.
UMnu Sunday Moyo oncintisa kukhetho lwamakhansili emele ibandla lePeople’s Rainbow Coalition kuWard 3 eMatshetsheni, eMzingwane uthi okudanisayo yikuthi abantu bahambela ize esikhathini esinengi.
“Imango ehanjwa ngabantu besiya ezibhedlela mikhulu kakhulu, uthola umuntu ozithweleyo ehamba 4 to 5km ngenyawo elanda ikilinika kumbe isibhedlela khonapho ezathola futhi kungela mithi,” kutsho uMoyo.
Umqondisi wesibhedlela esikhulu seGwanda uMnu Purgie Chimberengwa uhlezi ekhalaza ngokusilela kwamaphilisi lemithi ikakhulu emakilinika lasezibhedlela ezisemaphandleni eGwanda.
