Amabandla ezombusazwe asacathulayo athi azesebenzela ukuthuthukisa isizwe samaNdebele nxa enganqoba kukhetho ngoba sisalele emuva kwezentuthuko ngenxa yobandlululo olukhona elizweni.
Inengi lamabandla aphikisayo azancintisa kukhetho oluzayo ethesa eleZanu PF umlandu wokubandlulula uzulu wasemaNdebeleni osekudale ukuthi lesisabelo sisalele emuva kwezentuthuko kusukela ilizwe lithola uzibuse ngomnyaka ka 1980.
UMnu Moses Mzila Ndlovu ozancintisa kukhetho lwedale lephalamende edinga ukummel iBulilima East uthi ibandla lakhe le Alliance for National Salvation i-ANSA lizaqeda ubandlululo obalethwa yiZanu PF.
“Umbuso weZanu eminyakeni engu 38 eyedlulileyo ube lobandlululo olunye olumangalisayo.Mina am saying omunye lomunye kayethola iland ngakibo that’s the only fairest way of distributing land, okwesibili sikhangele ukuthi ngoba iZanu ibingasupporter eMatabeleland ngo1980 ithethe abantu abavela eMashonaland yabafaka ezikhundleni zamakhiwa ngo1980 and it continued.We are saying omunye lomunye kayethola ithuba ngakibo kasizondi muntu but neither do we want ukuthi sizondwe,” kutsho uNdlovu.
Inkokheli yeMthwakazi Republic Party uMnu Mqondisi Moyo ozancintisa kukhetho lwedale lephalamnede edinga ukummel iMatobo North uthi kuyadingeka ukuthi uzulu aphiwe amandla okuzilawula ukuze kube lentuthuko kwelemaNdebeleni.
“Abantu b akithi abalayo amandla okuzilawula kuzabelo zabo politically, yikho uthola ukuthi singakhangele indawo enje ngeGwanda yenaleyi yindawo enothe kakhulu elentozonke but abahlali bayo ababenefit lutho.Esikuthembisa abantu bakithi yikuthi sithi amandla kaye ebantwini izinto zonke zingabuyi zivela eHarare kodwa izinto kazisukele phansi zisiya phezulu, hayi ukuthi zisukele phezulu zisiya phansi abantu betshelwa okokwenza,” kutsho uMoyo.
UNkosazana Busile Ndlovu ozancintisa kukhetho lwedale lephalamende emele i-Republicans Party of Zimbabwe i-RPZ uthi ibandla lakhe lifuna ukuletha umbuso olokuthembeka.
“Manje siyiparty entsha kodwa esikuthembisa abantu sibathembisa ukuthembakala ukuthi abantu basithembe sifuna ukusebenza labantu sibatshela iqiniso ngasosonke isikhathi, sibonisana singumphakathi ukuthi uhlupho lulapha lalapha,” kutsho uNdlovu.
UMnu. Matthew Sibanda ozamela iZAPU kukhetho lwedale lephalamende eMangwe uthi ibandla lakhe lizalwisa ukuthuthukisa ezomnotho.
Kutsho uSibanda: “Abantu beZimbabwe balohlupho olukhulu kakhulu akula mali emabhanga, akusela fekhithali evuliweyo esebenzayo akukho nje umsebenzi wonke, ngaleyo ndlela besifisa ukuthi abantu basikhethe njengeZAPU iparty eyiyo eledemocracy elombuso okhululekileyo , freedom of speech engasoze incindezelwe abantu njengaleyi iparty iparty esibusayo kulelilizwe.”
Bafika phose ikhulu - 99 abafuna izikhundla ezilitshumi lantathu zamalunga edale lephalamende eZansi yemaNdebeleni njalo alitshumi lasithupha amabandla ezombusazwe angene kukhetho kulesi sabelo kwathi abanye bangena bengamalunga azimeleyo.
