Abalwa impi yenkululeko abasekela icele leZanu PF elikhokhelwa nguMnu Emmerson Mnangagwa batshayiwe kakubi ngamapholisa eHarare namuhla njalo bathelwa intuthu ehitshayo (teargas) ngesikhathi bezama ukwenza umhlangano enkundleni yeCity Sports Center.
Inhlanganiso ezizimeleyo ezigoqela iHeal Zimbabwe leCrisis in Zimbabwe Coalition zithi zikhathazekile kakhulu ngokulwisana okwenzakala kubandla leZanu PF. Zithi ukulwisana lokhu sokusenqabela uhulumende weZanu PF ukuthi alungisise inking ilizwe elibhekale lazo ezigoqela indlala lokubhidlika komnotho.
Isiphathamandla sebandla lePeople’s Democratic Party (PDP) uMnu Elliot Shelton, yena othunjwe eGwanda izolo, utholakele duzane lealeli dolobho etshaywe kakubi njalo egeliwe lama dreadlocks akhe. UMnu Shelton uthi ubethunjwe ngabacuphi bakahulumende.
KuLivetalk namhlanje sikhangela isiko lokubhadalisa amalobolo. Abanye abesifazana, ikakhulu ontanga, bathi kabawuthakazeleli umkhuba lo ngoba kubenza bazibone njengabantu abathengiswayo.
Lingakhuthwa yilezindaba lezinye kuStudio 7 ngo 8 ntambama kumagagasi athi 909 am, 4930, 12080, lo 15460 kilohertz kuShortwave. Sitholakala njalo kuFacebook ekhasini lethu ele VOA Ndebele.
